Erzeni konfirmon Plorin, i merr portierin Besëlidhjes

Dje në mesditë, Erzeni i Shijakut ka zhvilluar seancën e parë stërvitore për vitin 2018 në kuadrin e përgatitjeve për pjesën e mbetur të fazës së dytë të kampionatit për Kategorinë e Parë. Ka qenë një fillim disi i vonuar për shkak të ndryshimeve që u bënë në mesjavën e kaluar që përfshiu stafin drejtues, atë teknik, si dhe me largimin e dy futbollistëve të njohur, Alfred Deliallisi dhe

Aldo Mitraj. Sidoqoftë, në orën e caktuar 14:00, ekipi i

Erzenit ishte i rreshtuar për fillimin e stërvitjes, e cila u drejtua nga trajneri i dytë, Shkëlqim Troplini.

Trajneri - Ishte paralajmëruar që në seancën e parë se skuadrës do t'i bashkohej tekniku shkodran Elvis Plori.

Por, siç u mësua më vonë, mosardhja e teknikut Plori lidhet me disa detaje të vogla siç ndodh rëndom në këto raste. Në një prononcim për gazetën në lidhje me këtë çështje, drejtori i ri i klubit, Astrit Hoxha, sqaroi se: "Është e vërtetë që tekniku Plori duhet të ishte i pranishëm sot (dje) për të filluar procesin stërvitor, por u pa e nevojshme që të kishte dhe një komunikim përfundimtar për ardhjen e teknikut Plori në drejtimin e Erzenit. Mund të them me siguri që ardhja e tij nesër (sot) për të drejtuar skuadrën shijakase është 99% e sigurt sepse gjithçka është mbyllur sipas rregullave. Nga ana tjetër, edhe për portierin Elson Demi mund të thuhet e njëjta gjë, sepse edhe ky do të jetë që sot në stërvitje me grupin si portier i parë tek Erzeni. Ndërkohë po bëjmë të gjitha përpjekjet për zëvendësimin e dy futbollistëve kryesorë të larguar, Deliallisi dhe Mitraj, për të bërë sa më parë plotësimin e skuadrës me elementë të duhur për të qenë më të përgatitur për ndeshjen e parë më 27 janar në Shijak me Besën", përfundon drejtori i përgjithshëm i Erzenit, Astrit Hoxha. Pritet që gjërat të ndryshojnë në skuadër me një trajner të ri dhe disa lojtarë cilësorë që do të afrohen. Fiqiri Shehu