Kimish: Kisha dhimbje në gjithë trupin

Që prej datës dy janar, skuadra e Bajernit ka udhëtuar drejt Dohas në Katar për të nisur një seancë stërvitore për pesë ditë, por disa nga lojtarët bavarezë nuk kanë arritur të stërviten së bashku me ekipin, si pasojë e problemeve shëndetësore dhe problemeve fizike. Mats Humels dhe Robert Levandovski kanë ndërprerë stërvitjen, për shkak të dëmtimeve, ndërsa mbrojtësi anësor, Xhoshua Kimish, ka qenë i sëmurë pas mbërritjes në Katar. Për këtë arsye, 22-vjeçari ka mundur të stërvitet me skuadrën e rekordmenëve gjermanë vetëm ditën e fundit, të dielën. Gjithashtu, pritet që Kimish të humbasë edhe përballjen e parë të raundit të dytë në Bundesligë ndaj Leverkusenit në datën 12 janar. Gjatë një interviste për median gjermane, "Bild", Xhoshua Kimish ka folur lidhur me gjendjen e tij shëndetësore duke thënë se: "Kam pasur të bëj me gripin edhe më parë, por kisha mundësinë të stërvitesha me skuadrën pa probleme. Kësaj radhe e kam kuptuar se nuk kisha më mundësi të vazhdoja. Më dhembte i gjithë trupi, ndaj më duhej të vendosja që të pushoja". Kimish ka arritur të luajë në të gjitha përballjet e gjysmës së parë të sezonit 2017/18 me fanellën e Bajernit, gjithashtu edhe në përballjet e Kupës së Konfederatave me kombëtaren gjermane, çka ka sjellë një lodhje të jashtëzakonshme fizike për të. Lidhur me pjesën e lodhjes fizike, Kimish tha: "Trupi im nuk ishte mësuar me këtë intensitet. Kam luajtur shumë, por kjo s'do të thotë që nuk di si t'ia dal mbanë". Sa u përket titujve në raundin e dytë të sezonit aktual, mbrojtësi bavarez shtoi: "Në aspektin e titujve, gjithçka është e mundur".