Kukësi thyen turqit për dy minuta, Pakult: Luajtëm super
Trajneri Pakult e nis me risi, mbrojtësi Rustem Hoxha luan si mesfushor shkatërrues
Kukësi i bën një start fantastik vitit 2018, teksa fiton miqësoren e parë ndaj një kundërshtari shumë të fortë si Kaiserispor. Ndeshja e djeshme e luajtur në Antalia shënoi edhe debutimin e trajnerit austriak, Peter Pakult, në pankinën e verilindorëve. Kampionët e Shqipërisë u treguan cinik në pjesën e parë, duke shënuar dy gola të shpejtë, në një hark kohor prej dy minutash (21 dhe 22) me anë të Ardit Peposhit dhe kapitenit Ylli Shameti. Dora e teknikut austriak u dallua menjëherë, ku vendosja taktike bëri diferencën, por gjithashtu edhe përzgjedhja e lojtarëve. Si kurrë më parë, Pakult i gjeti një pozicion të ri mbrojtësit Rustem Hoxha, i cili dje u aktivizua në rolin e mesfushorit shkatërrues, në krah të Besar Musollit. Futbollistët verilindorë bllokuan sulmet e turqve, duke ushtruar presing të lartë dhe mbajtur larg portës kundërshtarin. Kapiteni Shameti ishte heroi i takimit, ku në golin e parë të shënuar nga Peposhi në minutën e 21të, dha një asist fantastik për Bakajn. Ky i fundit driblon njërin prej mbrojtësve, godet, por portieri Miamer kthen topin, teksa Peposhi i vëmendshëm e dërgon në rrjetë. Festë te kuksianët, ndërsa vendësit mundohen të dalin në sulm, por në pak sekonda
e gjejnë veten në një situatë të vështirë. Këtë herë Kukësi fiton një goditje nga këndi. Kornen e merr përsipër Guri, i cili harkon bukur në zonë dhe Shameti kërcen mbi të gjithë, duke shënuar golin e dytë për Kukësin. Kaiserispori nuk e përtyp dot këtë disavantazh të dyfishtë dhe del i gjithi në sulm për të kërkuar ngushtimin
e shifrave. Pas shumë përpjekjeve, turqit gjejnë në minutën e 40-të golin. Ishte në fakt një supergol i Turan, i cili realizoi me anë të një goditjeje dënimi nga rreth 30 metra. Në këtë mënyrë përfundon me shifrat 1-2 pjesa e parë, me Kukësin që kryesoi me meritë. ADMINISTRIMI
Në pjesën e dytë të dy trajnerët hodhën në lojë disa futbollistë, ku për Kukësin Pakult mendoi për mesfushën. Austriaku i kishte besuar të riut Sadiku vendin e titullarit, ndërsa në pjesën e dytë e zëvendësoi me Imamin. Më pas, Idrizi ia la vendin Donjet Shkodrës, ndërsa Koliçin për Frashërin. E veçanta ishte se në fund pati katër minuta edhe për të riun Valdrin Hallaçi, i cili mbajti fanellën me numër 13, që për pesë vite u vesh nga i afërmi i tij, ishkapiteni Rrahman Hallaçi. Për këtë të fundit, ndeshja e djeshme ishte e para në rolin e zv.trajnerit, teksa bashkë me Peter Pakult e nisën me fitore aventurën te Kukësi.
DZARIA DHE ZDERIÇ