Dëmtimi, Bufoni humb shansin për rekord
Xhixhi rrezikon primatin e paraqitjeve në Serinë A, ndërkaq Juvja kërkon zëvendësin
Ku ka përfunduar Xhixhi Bufon? Prej më shumë se një muaji, portieri i Juventusit nuk zbret në fushë prej dëmtimit në pulpë të pësuar në sfidën ndaj Napolit. Një mungesë që ka kaluar pa rënë në sy falë paraqitjeve më se pozitive të Vojiçek Sheznit, i cili po përgatitet për atë që do të jetë roli si titullar duke nisur nga sezoni i ardhshëm. Mbetet megjithatë fakti që për Bufonin askush nuk po flet më dhe, me shumë mundësi, situata do mbetet e tillë edhe pas pushimeve, meqenëse rikthimin e tij nuk do e shikojmë as në ndeshjen kundër Xhenoas me rinisjen e kampionatit.
REKORDI - Një mungesë që do t'i heqë mundësinë për të arritur rekordin e paraqitjeve në Serinë A, që momentalisht i përket Paolo Maldinit me 647 ndeshje të zhvilluara, 18 më shumë se numri një i bardhezinjve: gjithmonë nëse Bufon në qershor konfirmon tërheqjen e tij nga futbolli. Megjithatë, është krijuar përshtypja se legjenda bardhezi po përfiton nga kjo "pauzë" për t'u përgatitur për një rol drejtuesi në një të ardhme.
ZËVENDËSI - Ndërkaq, në Torino po mendojnë për të ardhmen e portës. Me Sheznin që ka konfirmuar se është gati të marrë
"trashëgiminë" e lënë nga Xhixhi, tashmë po kërkohet një zëvendës në lartësinë e duhur. Sepse nëse Karlo Pinsoljo do qëndrojë si zgjedhje e tretë, do nevojitet një numër dy me peshë. Për momentin po qarkullojnë emra të ndryshëm lojtarësh ekspertë dhe
me një kaluar, ndoshta të largët, pikërisht te Juventusi. Nga Antonio Mirante te Stefano Sorrentino, duke kaluar nga rikthimi i Emil Auderos prej huazimit te Venecia e Pipo Inzagit, ku po bën paraqitje pozitive. Është përmendur edhe
emri i Andrea Konsiljit, që duket se ka vendosur të mos qëndrojë te Sasuolo, ndërsa nga Turqia qarkullon edhe emri i 19vjeçarit, Harun Tekin i Bursasporit. Cilido qoftë, megjithatë, do duhet të ketë durim dhe shpatulla të gjera.