Përmbysje me zemër, Aguero nderon Sitin
“Qytetarët” vuajnë në gjysmëfinalen e parë të Kupës së Ligës
U desh një gol i Kun Agueros në minutën e dytë të shtesës për t'i dhuruar fitoren Mançester Sitit në gjysmëfinalen e vajtjes së “Carabao Cup” në “Etihad”. Bristol Siti, që renditet në vend të katërt në Championship, kategorinë e dytë në Angli dhe që në këtë kompeticion ka eliminuar katër klube të Premier Ligës (Uotfordin, Stok Sitin, Kristal Palasin dhe Mançester Junajtid) trembi edhe Pep Guardiolën, pasi eliminoi Zhoze Murinjon. Një penallti e Reid ngriti peshë 8 mijë tifozët (rekord historik për një skuadër udhëtuese në stadiumin e Sitit) në fundin e pjesës së parë. Por pas pushimit erdhi edhe përmbysja e kryesuesve të Premier Ligës, që fillimisht barazuan me një trekëndësh spektakolar të De Brujnes me Sterling, pastaj në minutën e 92-të një krosim fantastik i Bernardo Silvës gjeti Agueron me kokë në zonë, i cili tronditi miqtë. U duk që në fillim se nuk do të ishte një shëtitje për ekipin e Guardiolës. Por më 23 janar në “Ashton Gate”, nuk pritet të jetë kurrsesi një shëtitje. Pak përpara pushimit, një ndërhyrje në
kohëvonesë e Stonsit në zonë nuk i la asnjë dyshim arbitrit Entoni Tejlor. Reid nuk gabon nga 11 metra dhe “Robins” shkojnë na avantazh në dhomat e zhveshjes. Pas golit të De Brujnes në pjesën e dytë, Siti iu afrua shumë herë avantazhit, por ai do të vinte
vonë. Bristol u zgjua nga ëndrra, por një gjë është e sigurt: Në 90 minutat e fundit, ata do të tentojnë sërish të bëjnë mrekullinë.
LI XHONSON – “Jam shumë krenar për skuadrën time dhe i zhgënjyer për golin e pësuar në fund. Por djemtë ishin të mrekullueshëm. U thashë në fund të ndeshjes që jeni fantastikë. Presingu ishte i jashtëzakonshëm te goli i parë. Erdhëm këtu dhe u përpoqëm që të luanim futboll dhe u hapëm disa probleme. Djemtë nuk duhet të jenë të zhgënjyer, sepse janë ende në lojë. Ata i treguan botës sesa futbollistë të mirë janë. Erdhëm dhe sulmuam, nuk parkuam autobusin”, tha trajneri i Bristolit. “Guardiola më tha në fund se ne luajtëm më mirë se shumica e ekipeve të Premier Ligës që vijnë këtu”.