Dede trajner i Erzenit, Ahmataj te Burreli
Drejtori Hoxha: Plori ishte shumë afër akordit, por nuk ramë dakord për financat
Në një kohë që të gjithë prisnin Elvis Plorin në krye të skuadrës së Erzenit, gjërat kanë ndryshuar shpejt. Drejtori Astrit Hoxha ka deklaruar për "Panorama Sport" se trajner i ri do të jetë Nevil Dede. "Ramë dakord për të gjitha pretendimet e secilës palë dhe trajneri i njohur Dede u shpreh i gatshëm për të drejtuar skuadrën e Erzenit, madje ai ka qenë i gatshëm të fillonte seancën stërvitore sot (dje), por për shkak të një impenjimi personal, ai do prezantohet në skuadër nesër (sot) në orën 14:00", ka thënë Hoxha. Natyrisht, ardhja e teknikut të ri tek Erzeni në një moment të tillë është pozitiv, sepse ai do të njihet me kontingjentin ak-
tual dhe, në bashkëpunim me drejtuesit e Erzenit, do të kërkojnë që të zhvillojnë merkato, duke u përforcuar aty ku tekniku të shohë të nevojshme ndërhyrje. Të gjitha lëvizjet do të bëhen me shpejtësi, duke qenë se nisja e kampionatit nuk është shumë larg dhe trajnerit i duhet koha e mjaftueshme që të njohë skuadrën. Dede është një emër i njohur në futbollin shqiptar. Aktualisht është edhe trajneri i ekipit të femrave U-19, ndërsa në të kaluarën ka drejtuar ekipe si Tirana, Laçi, Luftëtari apo edhe Kastrioti. LËVIZJET
Erzeni ka zhvilluar dje seancën e dytë stërvitore, përsëri në drejtimin e trajnerit të dytë, Shkëlqim Troplini. Në stërvitje, krahas dy të larguarve Deliallisi dhe Mitraj, është konfirmuar dhe largimi i Kallucit. Ndërsa dje ka nisur përgatitjet tek Erzeni portieri i ardhur nga Lezha, Demi. Ndërkohë drejtori i përgjithshëm, Astrit Hoxha, ka folur edhe për prishjen e akordit me trajnerin shkodran Plori. "Është e vërtetë se pata theksuar se Plori do të ishte 99% pjesë e Erzenit, por ai 1% përmbysi gjithçka. Nga
kontakti që pata me teknikun shkodran Plori, nuk u arrit marrëveshja për shkak të pretendimeve të tij nga ana financiare. Kështu që, marrëveshja që pritej u prish përfundimisht", ka thënë Hoxha, i cili, menjëherë ka vendosur për të afruar Deden në krye të ekipit.