Klubet, merkato në dëm të talenteve
Nevoja për riparime bën që të gjithë klubet t'i drejtohen merkatos për elementë që mund të plotësojnë nevojat imediate për pjesën e dytë të sezonit. Mirëpo, kryesisht për klubet shqiptare, mungesa e strategjisë afatgjatë bën që klubet të kryejnë merkato "fast food". Gjithkush interesohet për futbollistë që janë aktualisht të sprovuar dhe që mund të garantojnë rezultate imediate. Së pari, kjo ka rrezikun që secili lojtar ka nevojë për një kohë të caktuar përshtatjeje. Si të mos mjaftonte kjo, të parët që e vuajnë këtë lloj qëndrimi të ekipeve shqiptare, janë elementët vendës. Cilido talent nuk gjen mjaftueshëm hapësirë me këtë strategji.
TË HUAJT - E ndërsa shpëtimi i vetëm kërkohet në tregun e huaj, evident është niveli që përgjithësisht transferohet në kampionatin shqiptar, pasi bëhet fjalë për "dorën e katërt". Niveli kryesor transferohet në kampionatet elitare, Spanjë, Angli, Itali etj, ku shumat e transferimeve janë disa milionë euro. Niveli i dytë i futbollistëve, nga tregu rus apo edhe ai turk, ku niveli i shpenzimeve është i lartë dhe shumat e shpenzuara janë tejet të kripura për vendin tonë. Së treti, ky nivel futbollistësh kërkon paga të larta për vetë nivelin që kanë dhe nuk e mundëson afrimin në vendin tonë. Kjo, për vetë faktin se paga prej disa milionë eurosh nuk mund të përballohen në Shqipëri dhe secili prej këtij niveli nuk e ul standardin e pagës për t'u transferuar në vendin tonë. E për pasojë, Shqipërisë i mbetet veçse të përthithë "dorën e katërt" të nivelit të futbollistëve të huaj. Sigurisht që elementet e spikatur nuk kanë munguar dhe që kanë shpërblyer besimin e klubeve, por nëse të tillë numërohen me gishta, në vendin tonë vijnë… dyzina. Për sa kohë të mungon një strategji afatgjate e klubeve, në vendin tonë do të ketë gjithmonë vend për të tillë të huaj.