Regjim kazerme, të gjithë në krevat në orën 22:00
Drejtuesit kanë vënë rregulla të rrepta për lojtarët në Turqi
Partizani ka mbyllur dje ditën e dytë të minifazës përgatitore në Antalia të Turqisë. Përgatitjet kanë nisur me rregulla të hekurta në këtë periudhë dhe lojtarët janë detyruar që t'i zbatojnë me përpikëri, në mënyrë që të mos penalizohen në vijim. Rregullat kanë të bëjnë me regjimin që lojtarët do të ndjekin, por edhe me sjelljen e tyre, ku u është kërkuar që të jenë shumë të kujdesshëm me frekuentimin e rrjeteve sociale. Mësohet se futbollistëve u është kërkuar që të minimizojnë përdorimin e rrjeteve sociale, në mënyrë që të evitohet rrjedhja e informacioneve për atë që ndodh gjatë fazës përgatitore në Antalia. Drejtuesit kanë kërkuar nga lojtarët që të jenë korrekt me oraret e përcaktuara. Të gjithë duhet të konsumojnë vaktet në të njëjtën kohë dhe të jenë korrekt me orarin stërvitor dhe programin. Një tjetër rregull që duhet zbatuar nga lojtarët është orari i darkës, që përkon me kohën kur ata duhet të bien në gjumë. Drejtuesit kanë dhënë urdhër që ora 22:00 duhet t'i gjejë të gjithë futbollistët në krevat. Ngarkesa e lartë stërvitore, e cila do të merret gjatë dy seancave
në ditë, kërkon që lojtarët të flenë mjaftueshëm, në mënyrë që të jenë të gatshëm për ditën në vijim. Një orë para gjumit, ekipi do të ndjekë seanca teorike të detajuara me pamje filmike. Drejtuesit shpresojnë që regjimi i kazermës të japë efekt dhe ekipi të marrë energjitë e
duhura për pjesën në vijim.
SPASTRIMET S'KANË MBARUAR - Para nisjes për në Turqi, të kuqtë pësuan një "tërmet", pasi tre titullarë u lanë jashtë ekipit, Renato Malota, Gëzim Krasniqi dhe Emiljano Vila. Por "operacioni fshesa" nuk quhet i mbyllur te Partizani dhe për këtë janë në dijeni edhe lojtarët që aktualisht po përgatiten në Antalia. Madje, thuhet se plani i spastrimit para nisjes për Turqi ka qenë më i gjerë, por duke mos gjetur zëvendësuesit, numri i të larguarve mbeti tre. Ndaj lojtarët duhet të jenë korrekt dhe të kujdesshëm, pasi faza përgatitore në Antalia është si një "Big Brother", ku vëllai i madh shikon gjithçka dhe kush ngre krye, largohet me ceremoni. Nuk përjashtohet mundësia që ata që ishin piketuar në fillim të spastrohen nëse gjejnë alternativat e duhura.