Alvesh: S'më trembin afrimet, e mbyll sezonin te Flamurtari
Sulmuesi ka hedhur poshtë mundësinë e largimit në janar
U përfol se mund të shitej në janar, por Danilo Alvesh mbyll çdo gjë, të paktën për momentin. Sulmuesi brazilian thekson se është pjesë e Flamurtarit deri në fund të sezonit dhe se do ta respektojë kontratën. I kontaktuar dje nga "Panorama Sport", Alvesh konfirmoi se do të qëndrojë te Flamurtari dhe se ndihet mirë në ambientin e klubit vlonjat. Ai bëri të ditur se aktualisht është i përqendruar te faza përgatitore dimërore dhe se nuk mendon për asgjë tjetër. "Jam shumë i kënaqur në Vlorë. Ndihem mirë dhe të gjithë më respektojnë, që nga
qytetarët, ashtu edhe drejtuesit e klubit. Presidenti Idrizi është shumë korrekt, por unë jam i kënaqur edhe me shokët e skuadrës. Dua të sqaroj se jam në kontratë me Flamurtarin deri në fund të sezonit. Nuk bëhet fjalë për largim nga Vlora. Ndoshta kur të përfundojë
kontrata do të ulem dhe do të diskutojmë me drejtuesit. Dua të theksoj se jam i lumtur në Vlorë dhe tashmë shumë i përqendruar te faza përgatitore këtu në Antalia. Dua të bëjmë më të mirën, me qëllim që të ndihmoj skuadrën për arritjen e objektivave sezonalë", ka
thënë Alvesh.
RIVALITETI
Bashkë me Danilo Alveshin, në sulmin e Flamurtarit janë edhe Tomislav Bushiç e Igor Nedeljkoviç. Mirëpo, trajneri Shpëtim Duro ka pak gjasa që të preferojë si titullar brazilianin. Gjithsesi, vetë Alvesh nuk i trembet konkurrencës. "Është gjë e mirë që në skuadër të ketë konkurrencë. Kjo të motivon më shumë. Kemi një grup të mirë lojtarësh dhe unë do të jap maksimumin tim, me qëllim që të justifikoj besimin e trajnerit, drejtuesve dhe mbështetjen e tifozëve. Të gjithë jemi për një qëllim këtu, pra, të bëjmë më të mirën për Flamurtarin. Unë nuk i druhem konkurrencës", përfundoi braziliani i kuqezinjve. Ndërkohë, kujtojmë që trajneri Shpëtim Duro nuk e ka përjashtuar mundësinë e shitjes së sulmuesit Alvesh. "Varet, nëse ka ofertë dhe interes të përbashkët edhe mund të ndodhë. Natyrisht që është rritur konkurrenca dhe do të luajë ai që e meriton formacionin", pati thënë Duro. Por, vetëm një ditë pas prononcimit të trajnerit, ishte administratori Sinan Idrizi që mbylli gjithçka. Sipas këtij të fundit, me Alveshin do të ketë bashkëpunim afatgjatë. "Unë nuk e shes Alveshin. Nuk ka klub në Shqipëri që e blen atë, ai nuk ka çmim. Po mendoj që të rinovojmë edhe për tri vite të tjera", është shprehur kreu i klubit, i cili njihet edhe si një beniamin i sulmuesit, pavarësisht përplasjeve.