Ka "hall" për mbrojtjen, klubi i paqartë
Xhevahir Sukaj dhe Sedat Berisha mbeten dy afrimet e konfirmuara nga Vllaznia. Megjithatë ky është vetëm fillimi, pasi prej ditësh klubi po operon në merkato për të përforcuar grupin. Dhe emrat nuk kanë munguar, sidomos për mbrojtjen që konsiderohet si reparti më problematik për momentin e sidomos qendra e saj. Drejtuesit e klubit në bashkëpunim me stafin teknik janë duke parë mundësinë për të sjellë në skuadër edhe ndonjë futbollist tjetër. Ata kanë parë disa opsione në tregun e huaj, madje tregu malazez mbetet si "burim" për të gjetur të duhurin. Megjithatë nuk përjashtohet mundësia që afrimet të vijnë nga Partizani. Bëhet fjalë për dy të sapolarguarit nga të kuqtë, Gëzim Krasniqi dhe Renato Malota, të cilët po lakohen më së shumti. Edhe pse në klub as e pohojnë dhe as e mohojnë, mësohet se drejtuesit i shohin si alternativa për të siguruar njërin prej tyre. Gjithsesi, kontaktet zyrtare duhet thënë që nuk kanë nisur dhe momentalisht gjithçka ka mbetur në kuadrin e dëshirave. Nëse bëhet fjalë për të parin apo për të dytin, kjo çështje do të zbardhet vetëm në vazhdim. Megjithatë, e vetmja gjë e sigurt është që Ernest Gjoka do medoemos një qendërmbrojtës për pjesën e mbetur të sezonit. Pasi dështoi pista "Jakovljeviç", tashmë vëmendja është përqendruar te studimi i alternativave të tjera. Por edhe linja e majtë ka nevojë për ndërhyrje, edhe pse jo aq imediate sa qendra. Dhe në "fokus" është venë një tjetër lojtar i larguar, por këtë herë nga Flamurtari. Ergis Mersini shihet si opsion, megjithatë edhe në këtë rast nuk ka asgjë konkrete. Në klub duket se po tregohen të kujdesshëm dhe nuk duan që të hedhin asnjë hap të nxituar para firmave.