Kastrioti “peshkon” në Greqi, vjen portieri 21-vjeçar Petro

Kastrioti është grumbulluar në Golem që prej së hënës, ndërsa seancat stërvitore janë zhvilluar në Durrës dy herë në ditë. Ndryshe nga lista e shpallur nga krutanët, me grupin nuk është parë të stërvitet as Endri Lala (lojtar që ishte në provë) dhe as sulmuesi Denis Dyca. Ky i fundit, i kontaktuar nga gazeta, shprehet se ka disa arsye personale dhe se së shpejti do t'i bashkohet skuadrës. Sakaq, mesfushori i ardhur nga Rumania, Viorel Ferfelea, i është bashkuar grupit që të martën dhe po stërvitet së bashku me ta. Lojtari shihet si një përforcim cilësor, duke parë edhe eksperiencën që ka. Ai do të ndihmojë skuadrën në pjesën e mbetur të kampionatit për të arritur objektivat.

PORTA - Krutanët u nisën në fazën me vetëm një portier, atë të parin Klajdi Kuka, por që prej të martës numri i tyre është shtuar. Kuka do të ketë një rival 21 vjeç që vjen nga kampionati grek. Ilia Petro është emër i ri në kampionatin tonë, që më parë ka qenë te Luftëtari, pikërisht verën e vitit 2016. Portieri është prodhim i akademisë së PAS Janinës dhe, më pas, për disa sezone, është dhënë në formë huazimi në skuadra të ndryshme të futbollit helen. Këtë janar ai ka gjetur kohën e duhur për të dhënë kontributin e tij në Shqipëri, ku nga mbrëmja e së martës iu bashkëngjit Kastrioti, ku sipas krutanëve është në provë.

MIQËSORJA - Stafi teknik i krutanëve ka programuar disa miqësore gjatë këtyre ditëve. Testi i parë do të jetë më datë 13 janar dhe përballë Kastriotit do të jetë skuadra e Superiores, Laçi. Kjo ndeshje do t'i shërbejë stafit teknik me në krye trajnerin Nikaj që të shohë formën e futbollistëve pas disa seancave stërvitore të zhvilluara. Ai, gjithashtu, do të testojë edhe lojtarët e afruar së fundmi.