Volejbolli shqiptar dhe sfidat Pëllumbi: 2017-ta, një vit i mbarë
Viti 2017 për sportin e volejbollit ka qenë një ndër më të suksesshmit në vitet e fundit, kur bazohemi te rezultatet e arritura në fushë duke qenë një tregues më i mirë i një pune të madhe të bërë nga të gjithë aktorët e volejbollit shqiptar, lojtarët, skuadrat, trajnerët, si dhe vetë Federata Shqiptare e Volejbollit. Volejbolli shqiptar zhvillon rregullisht kampionatin kombëtar për meshkuj dhe femra, ku marrin pjesë ekipet e mëposhtme. Kampionati i të rriturve ka 9 ekipe: Erzeni, Partizani, Studenti, Tirana, Vllaznia, Skënderbeu, Farka Volej, Elbasani e Teuta, si dhe kampionati i femrave, ku marrin pjesë 8 ekipe: Barleti, Tirana, Partizani, Teuta, Skënderbeu, Vllaznia, Korabi e Lushnja. Përveç skuadrave profesioniste të të rriturve garojnë edhe skuadrat e grupmoshave si ato të të rinjve e të rejave, paratërinjtë dhe paratërejave, duke një pasur një shtrirje të madhe dhe kjo gjë konfirmohet edhe nga edicioni i tretë i Ligës Amatore, që këtë vit regjistron numrin rekord të 20 ekipeve pjesëmarrëse. Këtë vit, volejbolli shqiptar arriti të tjera nivele, si në aktivitetet kombëtare, ashtu dhe ato ndërkombëtare, në nivel profesionist dhe amator, në volejbollin e sallës dhe atë të plazhit. Lidhur me punën njëvjeçare, presidenti Pëllumbi pak kohë më parë gjatë analizës së bërë lidhur me ecurinë deklaroi se: "Ne nuk lodhemi, përkundrazi, e gjithë kjo punë e bërë na nxit e na motivon më shumë për të ardhmen. Prandaj ne shtojmë impenjimet tona, pasi besojmë te puna jonë, te puna që bëjnë çdo ditë sportistet e trajnerët e skuadrave duke punuar me moton: 'Të gjithë së bashku, jemi një ekip. Së bashku për zhvillimin e volejbollit shqiptar'. Kërkojmë vazhdimisht që t'u japim mundësinë që të ndihen sa më të vlerësuar për të shpalosur më të mirën". Ndërkohë që është vijuar me sfidat dhe përballjet e vitit 2018. Ky vit do të jetë një tjetër një test për ekipet tona kombëtare. "Do të kemi më shumë ndeshje me ekipet senior, pasi do të luajmë në Ligën e Europës, Lojërat Mesdhetare dhe eliminatoret e Kampionatit Europian, pse jo duke pretenduar kualifikimin".