Lokateli dhe Kutrone rrëfejnë dhjetë vitet në një dhomë
Manuel Lokateli e Patrik Kutrone u bënë protagonistë të një interviste të dyfishtë në një nga emisionet e "Milan TV". Dyshja luan së bashku që në moshën dhjetëvjeçare dhe kanë kaluar në të gjitha ekipet zinxhir së bashku. Tashmë, te Milani i të rriturve, miqësia vazhdon me të njëjtin intensitet brenda dhe jashtë fushë. Sa dëme keni bërë në shtëpi duke luajtur me top? Lokateli: Eh sa shumë. Nuk e di se sa herë prindërit e mi kanë ndërruar abazhurët.
Kutrone: Jo vetëm abazhurë, por edhe disa vazo, tavolinë dhe lulet që mamaja i kishte me shumë merak.
Cili është idhulli në futboll?
Lokateli: Jam rritur duke parë Pirlon dhe frymëzohem prej tij. Kutrone: Më ka pëlqyer gjithmonë Morata për karakteristikat e tij. Kush është portieri më i vështirë për t'u mundur? Lokateli: Bufon, por... ( qesh, me sa duket i kujtohet goli i shënuar).
Kutrone: Për mendimin tim, më i forti aktualisht është Xhixho Donaruma.
Po futbollisti më i fortë, me të cilin je stërvitur? Lokateli: Kakà.
Kutrone: Pa dyshim edhe për mua Kaka.
Është më e vështirë t'i shënosh Bufonit apo Handanoviçit?
Lokatelli: Sa pyetje e vështirë!
Kutrone: Me gjithë rëndësinë e golit tim, mendoj se ai që shënoi Lokateli ndaj Juventusit ka një shkallë më të lartë vështirësie. Po dhomën e ndani vetëm te Milani apo edhe në kombëtare?
Lokateli: Po, po, gjithmonë bashkë, jo vetëm sepse kemi orare të njëjta kudo që lëvizim, por edhe sepse më pëlqen ta mund në "Play Station'.
Kutrone: Kemi dhjetë vjet që ndajmë dhomat dhe nuk kemi pasur kurrë as më të voglin problem. Jemi miq të ngushtë dhe ndihemi mirë bashkë.
Çfarë muzike dëgjoni?
Lokateli: Në dhomë muzikën e zgjedh unë, ndonjëherë vendos hitet e momentit, ndonjëherë tjetër diçka më qetësuese. Edhe te muzika merremi vesh shumë mirë.
Kutrone: Nuk kemi asnjë problem me muzikën, kemi ide të ngjashme edhe në këtë aspekt.