Konte: E kemi personale!

“Unë s’do ta harroj. Është diçka midis nesh, asgjë mes Junajtid dhe Çelsit”

Vazhdon lufta në distancë mes An tonio Kontes dhe Zhoze Murinjos. Dhe vigjilja e gjysmëfinales së Kupës së Ligës kundër Arsenalit ka sjellë raundin e radhës së përballjes së teknikut të Çelsit dhe Mançester Junajtid. Një kapitull që nisi të shkruhej nga "Special One", i cili e quajti "kloun" ish-teknikun e Juventusit për mënyrën e ekzagjeruar sesi feston golat e skuadrës së tij, duke sjellë kundërpërgjigjen e italianit se portugezi vuan nga skleroza. Sulmet vazhduan me ishteknikun e Interit që i kujtoi skualifikimin për trukime, ndërkohë që tekniku italian iu kundërpërgjigj me një "je njeri i vogël". Dhe dje, Antonio Konte iu rikthye sulmeve gjatë konferencës për shtyp përpara ndeshjes ndaj "topçinjve". Ai këmbënguli se armiqësia mes tij dhe portugezit është personale dhe se askush nuk duhet të ndërhyjë: "Mos kam ndoshta fytyrën e një personi të penduar për atë që kam thënë? Nuk besoj. Të dy thamë gjëra, të shohim çfarë do të ndodhë në të ardhmen". I pyetur nëse Shoqata e Trajnerëve mund të ndërhyjë për të vendosur paqen, Konte e përjashtoi si mundësi: "Ai përdori fjalë serioze, foli seriozisht dhe unë nuk do ta harroj. Ky nuk është një problem mes Mançester Junajtid dhe Çelsit, por një çështje mes tij dhe meje. Po e mbyll këtu".

NDESHJA - Duke iu rikthyer ndeshjes së sotme, tekniku i Çelsit planifikon të hedhë në fushë një skuadër të fortë në derbin e vajtjes kundër Arsenalit në "Stamford Bridge". Por ai tha se blerja e merkatos së janarit, Ros Barklej, do të mungojë, pasi nuk është ende gati: "Ndeshja me Arsenalin është shumë afër për të luajtur. Duhet të jemi të kënaqur me gjendjen e tij fizike, sepse ajo është e mirë dhe ai ka nisur të stërvitet me ne, ka nisur të kuptojë futbollin e skuadrës. Por ka ende nevojë pak për më shumë kohë në aspektin fizik, por edhe taktik. Megjithatë, gjendja e tij e përgjithshme është shumë e mirë. Se kur do të jetë gati që të luajë, unë nuk mund ta them tani".