Nuk ka merkato, Besëlidhja e "dorëzuar"
Besëlidhja zhvilloi dje një ndeshje testi brenda familjes, e para që nga grumbullimi pas pushimeve të fundvitit. Stafi teknik i kryesuar nga trajneri Gledis Lani në testin e djeshëm vëzhguan formën aktuale fizike të futbollistëve, kjo për të përpiluar programin stërvitor për të ardhmen. Trajneri, pas përfundimit të ndeshjes stërvitore, u prononcua për "Panorama Sport", ku ndër të tjera tha: "Pas 5 ditësh stërvitje sot(dje) zhvilluam një ndeshje testi brenda grupit, kjo për të parë gjendjen fizike aktuale të futbollistëve pas pushimeve të fundvitit. Në përgjithësi, lojtarët e kanë ruajtur kondicionin e tyre fizik të gjysmës së parë të sezonit, por ne duhet të punojmë që të marrin ngarkesat maksimale për gjysmën e dytë të sezonit, pasi është edhe pjesa më e vështirë e sezonit, ku skuadrat rifreskohen dhe ringarkohen, si fizikisht, ashtu edhe tekniko-taktikisht. Ne momentalisht jemi të përqendruar vetëm në përgatitjen fizike të futbollistëve, por pa anashkaluar edhe atë teknik-taktike, por në përmasa minimale. Ashtu siç e theksova edhe më lart, sa më shumë i afrohemi fundit, aq më i vështirë bëhet kampionati, ndaj na duhet që të punojmë pa u lodhur gjatë fazës përgatitore dimërore për t'i ngarkuar futbollistët nga të gjitha pikëpamjet maksimalisht. Pozitive për ne është se do të ruhet boshti si skuadrës që mbylli gjysmën e parë të sezonit, do të ndërhyhet vetëm aty ka me të vërtetë nevojë për rifreskim formacioni. Dihet se objektivi i Besëlidhjes është ngjitja në Superiore", përfundoi Lani. Preng Gjikola