Abazaj nuk mjafton, humbet Luftëtari
Gjirokastritët pësuan 3 gola në 24 minutat e para, Lika: Shpërdoruam shumë
Luftëtari është mundur edhe në takimin e dytë miqësor të luajtur në tokën turke, këtë herë kundër klubit Yeni Malatiaspor, që pozicionohet në vendin e 10të të Superligës vendëse. Në ndryshim nga ndeshja kundër Trabzonsporit, trajneri Hasan Lika kishte hedhur në fushë një formacion me dy risi. Nga minuta e parë luanin serbi Jakovljeviç në krahun e djathtë të mbrojtjes, si dhe braziliani Xhekson Ferreira në të majtë. Pjesa tjetër e skuadrës ishte e njëjtë. Pas 10 minutave të para të ekuilibruara, më pas turqit kanë dominuar. Fillimisht shënuan me Bujuk me kokë pas një goditjeje nga këndi. Turqit dyfishuan shifrat me
Boutaib vetëm katër minuta më pas. Bluzinjtë u shokuan nga ky disavantazh i shpejtë, por Malatiaspor arriti të shënonte edhe golin e tretë pa kaluar ende 24 minuta lojë. Luftëtari arriti që të ndryshonte totalisht lojën në vijim, por, edhe pse dominoi ndaj kundërshtarit, nuk shënoi më tepër
se një gol, me protagonist Kristal Abazaj në pjesën e dytë. Rastet për gjirokastritët kanë qenë të shumta, por sulmuesit kanë shpërdoruar. Përtej humbjes, trajneri Hasan Lika, i kontaktuar dje nga "Panorama Sport", u shpreh për lojën. "Morëm tre gola të shpejtë, edhe pse luajtëm shumë bukur. Shpërdoruam raste, por nuk u dorëzuam lehtë. Shënuam me anë të Abazajt dhe mund të shkurtonim sërish diferencën. Mbetem i kënaqur nga impenjimi, por jo nga rezultati që rezervoi takimi. Gjithsesi, për një pjesë të lojtarëve kam rezervat e mia, pasi duhet të jenë më impenjativ", deklaroi Lika. Ndërkohë, sulmuesi Vasil Shkurtaj nuk u aktivizua, për shkak të një problemi fizik. Lika futi si zëvendësues vetëm Mingën, Zeqjan, Rrapon dhe të riun Ziaj. Ndeshjen e ndoqën edhe presidenti Tavo e zv.presidenti Artur Dadaj që janë pranë skuadrës në Antalia. Tomor Shehu