Juventusi synon Ozilin, ja pse mund të bëhet
Ja 3 arsye "pro" dhe 3 "kundër" të transferimit verën e ardhshme në Torino
Lajmet që vijnë nga Anglia flasin për një "goditje" të madhe në merkato nga Juventusi: Mesut Ozil, fantazisti me vitlindje 1988 i Arsenalit dhe i përfaqësueses gjermane, dëshiron të largohet nga Londra për t'u transferuar në Torino, duke nisur një aventurë të re në Serinë A. Por, a paraqet kjo vetëm aspekte pozitive? A do ishte vërtet Ozil blerja perfekte për një Juventus që kërkon të jetë përherë e më konkurrues në optikën "Champions"? Ja 3 "pro" dhe 3 "kundër".
PRO - CILËSITË TEKNIKE - Ozil, e kotë të nënvizohet, është një prej pak fantazistëve në qarkullim i mirënjohur në panoramën europiane. Ish-mesfushori i Realit të Madridit zotëron cilësi teknike të padiskutueshme, që e lejojnë, çdo vit, të jetë vendimtar në zonën-gol (80 të realizuar në karrierë me skuadrat e klubeve), por mbi të gjitha të shërbejë asiste të panumërt për shokët e skuadrës. Nga kjo pikëpamje, Ozil nuk vihet në diskutim, duke parë se, në rolin e tij, është me shumë mundësi një prej 5 më të mirëve në botë.
KOSTO "ZERO" - Afrimi i Ozilit në Torino qershorin e ardhshëm do të ishte vërtet një "goditje" për Juven edhe nga pikëpamja ekonomike, së paku për koston e kartonit: gjermanit, në fakt, po i skadon kontrata me Arsenalin dhe do ishte një
transferim i bujshëm me kosto zero, me "impakt" ndoshta më të madh se Pogba, Pirlo e Khedira.
EKSPERIENCA NDËRKOMBËTARE
- Ozil numëron për momentin 91 paraqitje në kompeticionet europiane dhe plot 88 (me 22 gola të shënuar) me përfaqësuesen e tij. Fantazisti, ndër të tjera, ka fituar Botërorin e vitit 2014 dhe do ishte, pra, një sinjal i qartë për skuadrat kundërshtare: Juve ka si qëllim të shtojë cilësi dhe eksperiencë në një skuadër që, e kotë të fshihet, synon fitoren e Champions-it. KUNDËR - VENDOSJA
TAKTIKE - Ozil është një fantazist "puro", ose e shumta mund të angazhohet si sulmues në të dy krahët. Lojtari i Arsenalit duket i përkryer për modulin 4-2-3-1, ose për 4-3-21, të cilët Alegri adopton rregullisht. Por njëkohësisht ato role kanë bollëk lojtarësh dhe një lojtar i kalibrit të Ozilit nuk do e pranonte me siguri stolin. Teknikut bardhezi do t'i takonte të gjente një zgjidhje shumë të vështirë për të menaxhuar kaq shumë kampionë, brenda dhe jashtë fushës.
KARAKTERI - Si shumë futbollistë të tjerë elitarë, edhe gjermani përfaqëson një karakter të
vështirë për t'u menaxhuar. Në Torino, megjithatë, do ketë shoqërinë e Khedirës, Hovedesit dhe (kjo mbetet vetëm për t'u zyrtarizuar) Emre Xhanit.
PAGA - Momentalisht, Ozil përfiton 10 milionë euro në sezon tek Arsenali: shifra do e bënte lojtarin më të paguar te bardhezinjtë, dhe Dibala apo Higuain nuk do qëndronin me siguri duke parë. Bëhet fjalë, pra, padyshim, për një kampion. Nëse Juvja do ishte në gjendje të zgjidhte këto probleme, Ozil do ishte vërtet një nga goditjet më të rëndësishme të viteve të fundit nga "Zonja e Vjetër".