Kamza barazon me rumunët e Sepsi, shënon Plaku

Miqësore/ Paraqitje e mirë, kapiteni realizoi i pari dhe shpërdoroi në fund

Faza përgatitore e Kamzës në Antalia është e ndërthurur përmes stërvitjeve me ngarkesë të lartë dhe zhvillimit të disa ndeshjeve miqësore. Dje skuadra e trajnerit Ramadan Ndreu ka zhvilluar testin e tretë në këtë fazë, ku është përballur me rumunët e Sepsi OSK. Në dallim nga dy miqësoret e para, ku kamzalinjtë u mundën 4- 1 nga Gençlerbiligi dhe 1- 0 nga Alaniaspor, Kamza ka barazuar 1-1 dje me rumunët e Ligës së Parë. Trajneri Ndreu e ka nisur takimin e djeshëm me disa ndryshime nga dy ndeshjet e kaluara. Në miqësoren ndaj Sepsi nuk luajtën Erlis Ymeraj dhe Ermir Rezi, pasi janë të dëmtuar. Ndërsa mesfushori Hair Zeqiri vijon të mbetet jashtë këtyre testeve, pasi vlonjati nuk ka kondicionin e duhur dhe po ndjek një program individual. Kamzalinjtë kanë bërë një paraqitje të mirë në këtë takim, duke treguar se

faza përgatitore po ecën me ritme të kënaqshme. Pjesa e parë është kontrolluar nga të besuarit e trajnerit Ramadan Ndreu, të cilët arritën të shënonin edhe një gol me anë të kapitenit Sebino Plaku. 45 minutat e para u mbyllën me avantazhin e kamzalinjve. Në pjesën e dytë, të dy stafet teknike bënë ndryshime të shumta në formacion, duke u dhënë mundësi të gjithë lojtarëve të gatshëm. Goli i barazimit për rumunët u

shënua në minutën e 81-të nga nigeriani Benjamin Kuku, i cili u aktivizua në pjesën e dytë. Por, pas barazimit, Kamza pati një mundësi të pastër për të shënuar golin e dytë, por kësaj radhe kapiteni Plaku shpërdoron. Testimet e Kamzës, në kampingun stërvitor në Antalia, nuk janë mbyllur me këtë ndeshje, pasi në vijim kanë programuar edhe një tjetër ndeshje përpara kthimit në Shqipëri.