Nimaga: Më pëlqen të luaj në Rusi
“Klubi më ka vënë në dijeni për shitjen, por së pari dua të largoj makthin e dëmtimeve”
Mesfushori nga Mali i Skënderbeut, Bakari Nimaga, është një nga lojtarët që qëndron në pritje për t'u transferuar në një klub jashtë Shqipërisë. Pas katër vjetësh në Korçë, 23vjeçari pret të bëjë hapin e madh në karrierë dhe mundësitë janë reale që kjo të ndodhë brenda këtij muaji. Tashmë mesfushori është plotësisht i rikuperuar edhe prej problemeve fizike që ka pasur, por dhe psikologjike, si pasojë e një tragjedie në familje. Nimaga është gati për t'u rikthyer në nivelin e duhur, teksa, i kontaktuar dje nga gazeta, pranoi të fliste për gjithçka duke filluar nga gjendja e tij, merkato, por jo vetëm.
SITUATA
Bakari Nimaga flet fillimisht për fazën përgatitore dhe formën që po kalon. "Për fat të mirë, problemet më janë larguar, qoftë ato fizike, ashtu edhe psikologjike. Jam më i qetë tani dhe më i fortë,
prandaj po mundohem të jem i përqendruar në maksimum gjatë përgatitjeve. Për momentin, gjithçka po ecën mirë dhe jam kthyer në maksimumin e formës që kam pasur edhe në fillim të sezonit. Jam besimplotë se forma ime, por edhe e gjithë ekipit do të vijë në rritje. Shpresoj që dëmtimet të jenë një e kaluar për mua dhe të mos kem probleme", theksoi Nimaga. OFERTAT
I ndalur te merkatoja, mesfushori i Skënderbeut konfirmoi ato që "Panorama Sport" ka raportuar, teksa është pranë shitjes te klubi rus, Akhmat Grozni. Sipas tij, ka pasur interesim për të nga disa ekipe të ndryshme në Europë e Azi, por gjithçka është në dorë të klubit, që kërkon të bëjë më të mirën, qoftë për lojtarin, ashtu edhe për interesat e veta. Nimaga pranon se do t'i pëlqente një aventurë në Rusi, edhe pse ende nuk mund të thuhet se transferimi në këtë kampionat është fakt i kryer. "Për sa i përket merkatos, mund të them se kam dëgjuar shumë zëra rreth meje dhe një pjesë e tyre janë të vërteta. Duke iu referuar komunikimeve që kam pasur me drejtuesit e klubit, më kanë thënë që ka pasur disa ekipe që janë interesuar për mua. Gjithsesi, për momentin, nuk mund të përmend emra skuadrash për shkak se klubi është në negociata e sipër. Presidenti më ka premtuar se do të bëjnë më të mirën dhe normalisht gjithçka është në dorën e tyre. Rusia? Normalisht që mua do të më pëlqente një aventurë jashtë Shqipërisë, aq më tepër në Rusi, por këtë do ta vendosë klubi. E përsëris, gjithçka ia kam lënë në dorë presidentit Takaj dhe menaxherëve që po merren me transferimin tim. Në këtë moment dua të jem i qetë dhe i përqendruar vetëm te puna që po bëj me Skënderbeun. Kemi për të vijuar rrugën drejt kampionatit dhe prandaj dua të jem në maksimumin e mundësive për të ndihmuar ekipin. Asgjë nuk ka mbaruar dhe rruga është ende e gjatë. Natyrisht, nëse brenda këtij muaji klubi më njofton për transferimin, do ta mirëpres", përfundoi mesfushori.
PROBLEMET
Nimaga erdhi te Skënderbeu pa mbushur ende 19 vjeç, teksa u afirmua në një kohë të shkurtër. Pas sezoneve të para mjaft pozitive, në vitet e fundit dëmtimet e shpeshta nuk e kanë lënë rehat malienin. Gjithsesi, sa herë ka qenë në gjendjen më të mirë fizike, ka justifikuar besimin e klubit, duke qenë titullar në ndeshjet më të rëndësishme, qoftë në kampionat dhe Ligën e Europës. Paraqitja në këtë të fundit ka bërë që të tërheqë vëmendjen e klubeve të ndryshme të interesuara për të, mes të cilave Akhmat Grozni, që jep afro 400 mijë dollarë për kartonin.