Arsenal i turpshëm, Bornmëth e përmbys për katër minuta

Zërat e merkatos mund të kenë turbulluar disi skuadrën, por fakt është që Aleksis Sançez (edhe Mesut Ozil), ai që duket lojtari më në "ajër" te londinezët, mungoi kundër Bornmëthit, prandaj nga pjesa tjetër e skuadrës pritej më shumë. Por në të vërtetë, ajo që shihej si një sfidë që duhej fituar me çdo kusht për të mos u shkëputur shumë nga zona e Ligës së Kampioneve është shndërruar në një makth për Arsenalin në vetëm katër minuta. Transferta e djeshme e djemve të Vengerit shndërrohet nga një fitore në një disfatë të turpshme dhe historike (Bornmëthi si kishte mundur kurrë) në shifrat 2-1, ku Uillson dhe Ajbi zhvlerësojnë avantazhin e Bejerinit. Nëse pjesa e parë ishte një 45-minutësh ku më shumë sesa dëshira për të fituar mbizotëroi frika për të humbur, në fraksionin e dytë të lojës ndodhi gjithçka. Arsenali doli nga tuneli me një bindje në vetvete, i cili dha shumë shpejt rezultat. Pas vetëm shtatë minutash lojë, Iuobi sheh Bejerinin që shpërthen në shpejtësi në korsinë e djathtë dhe i sërvir një asist, të cilin anësori spanjoll e dërgon në rrjetë, me të zbritur në mes të zonës. Edhe pse portieri rival e preku topin, goditja ishte shumë e fortë për të mënjanuar që sfera të përfundonte në rrjetë. Por kush mendonte se Bornmëthi do të dorëzohej, gaboi rëndë, pasi të zotëve të shtëpisë do t'u mjaftojnë katërt minuta për të përmbysur gjithçka. Në të 70-ën, Frejzër gjen në zonë me një pasim të saktë Uilsonin, që është më i shpejtë se mbrojtësi dhe portieri kundërshtar, duke i paraprirë dhe tund rrjetë. Barazimi 1-1 ndez stadiumin dhe skuadrën vendase, e cila pas vetëm katër minutash shijon edhe avantazhin: këtë herë, Uillson fton nga brenda zone Ajbin, që nuk mendohet dy herë dhe e djathta e tij është e pakapshme. Arsenali gjunjëzohet, nuk ka më forca për të reaguar dhe në fund pranon humbjen e gjashtë sezonale dhe mbetet në kuotën e 39 pikëve, tetë "hapa" larg zonës Champions.