Shfryn Berluskoni: Akuzat ndaj Milanit, sulm politik

Ish-presidenti mbron Jonghong Li: Mbajti të gjitha premtimet

Me gjithë replikat dhe kundër rep likat e së shtunës mbi çështjen e shitjes së Milanit, dje ka vijuar beteja mediatike mes Silvio Berluskonit dhe mediave që, sipas tij, kanë publikuar një lajm të stisur për ta goditur mediatikisht në prag të zgjedhjeve. "Një vrimë e madhe në ujë", kështu e ka komentuar Silvio Berluskoni çështjen e ngritur një ditë më parë nga gazeta "La Stampa", e cila e akuzonte për manipulime të kostove në shitjen e Milanit. I ftuar në një emision në rrjetin "Mediaset", ish-presidenti ka deklaruar: "Sa herë që ka fushata elektorale dhe unë konsiderohem pretendent për fitore, shpiken të tilla histori. Këtë herë ishte Prokura e Milanos që përgënjeshtroi me shpejtësi lajmin, sipas të cilit, ne kishim përfituar nga shitja e klubit për të sjellë kapitale në Itali". Në shpjegimin e tij, Berluskoni është i qartë dhe përgënjeshtroi lajmin dukë thënë: "Nëse do të kisha qëllime të fshehura, do të isha i marrë nëse do të organizoja një operacion kaq të madh dhe të rëndësishëm mediatikisht. Nuk më ngelet gjë tjetër, përveç se të përgënjeshtroj çdo gjë dhe të theksoj se 'Fininves' ka bashkëpunuar me bankat e nivelit të lartë duke informuar për çdo hap prokurorinë e Milanos". "Kavalieri" nuk ngurron të komentojë dhe punën e pronarit Jonghong Li, për të cilin deklaroi se: "Milanin ia shita një sipërmarrësi kinez, i cili me ne ka qenë gjithmonë korrekt, teksa ka respektuar çdo premtim që na kishte dhënë gjatë bisedimeve për shitjen e klubit. Edhe në lidhje me merkaton, ata u sollën ashtu siç më kishin premtuar në momentin e arritjes së marrëveshjes".