Rafinja 10 milionë euro "larg" Interit, Barcelona u ofron italianëve Deulofeun
"Blic" i Auzilios, në Spanjë për transferimin e brazilianit
Kanë hyrë në fazën vendimtare bisedimet mes Interit e Barcelonës për Rafinjën. Klubi zikaltër, në veçanti drejtori sportiv Piero Auzilio, pritet në Spanjë gjatë kësaj jave për të "limuar" detajet e marrëveshjes e për të gjetur një akord mbi huazimin e brazilianit. Palët janë dëgjuar nëpërmjet telefonit dhe kanë fiksuar një takim ditët e ardhshme. Interi e ka gjetur akordin me babanë-menaxher, Mazinjo, sipas së përditshmes spanjolle "Mundo Deportivo", por Barça momentalisht i ka bërë "mur" ofertës prej 23 milionë eurosh (përfshi bonuset) të propozuar, duke qenë se katalanasit e vlerësojnë lojtarin rreth 30 milionë. Por udhëtimi i Auzilios drejt gadishullit iberik është një sinjal i qartë sesi zikaltrit i kanë të gjitha qëllimet për të mbyllur sa më shpejt marrëveshjen, në mënyrë që Spaleti ta ketë sa më shpejt në gatishmëri mesfushorin (edhe një herë jashtë listës së lojtarëve të grumbulluar nga Ernesto Valverde). Një firmë, pra, 10 milionë euro larg: çka Auzilio do përpiqet të reduktojë.
DELOFEU - Ndërkaq, pikërisht Barcelona u ka ofruar drejtuesve
interistë Gerard Deulofeun, pasi zikaltrit ishin interesuar të parët gjatë ditëve të para të janarit: Napoli ka arritur akordin me Verdin e Bolonjës dhe së shpejti pritet zyrtarizimi (edhe pse "axurrët" mund të tentojnë goditjen e dyfishtë); rikthimi te Milani nuk ka
pasur kurrë sinjale të forta, ndaj katalanasit duan të verifikojnë nëse Interi është i gatshëm të pranojë spanjollin, që megjithatë nuk duket më një prioritet për zikaltrit (pëlqehet më shumë, për nga pozicionet e shumta që mund të mbulojë Rafinja).