8 trofe, Shkodra pushtoi shumësportëshin në 2017
Futbolli i femrave, volejbolli dhe boksi janë absolutë
Shkodra mund të kon siderohet jo vetëm dje pi i futbollit, por dhe i të gjitha sporteve të tjera. Në Shkodër, sipas basketbollistit më të mirë shkodran Bërdica, "Sporti është si oksigjeni". Klubi shumësportësh Vllaznia funksionon rregullisht dhe ka në përbërje ekipe në sporte të ndryshme duke pasur rezultate mjaft të shkëlqyera gjatë vitit 2017, që mund të konsiderohet si një vit i sukseseve. Ekipet dhe sportistët e këtij klubi kanë qenë më të mirët në konkurrimet kombëtare duke u cilësuar edhe si klubi me rezultatet më të larta. Janë disa ekipe kampionësh, ndër të cilët mund të veçohen ato të boksit, atletikes për meshkuj, gjimnastikës për femra, futbolli i femrave, volejbolli meshkuj, çiklizmi, xhudo, taekuondo, etj. Janë 5 trofe kampionësh dhe 3 trofe kupash që shumësportëshi shkodran i ka rrëmbyer nga puna, mundi dhe vullneti i të gjithë sportistëve shkodranë në aktivitetet sportive kombëtare. Mund të veçojmë titujt: "kampione kombëtare" dhe fituese të Kupës së Shqipërisë në futboll për femra, po kështu "kampion" dhe fitues i Kupës së Shqipërisë në boks, "kampion kombëtar" dhe fitues i Kupës së Federatës në volejboll për meshkuj, "kampion kombëtar" në atletikë meshkuj dhe "kampion kombëtar" në gjimnastike për femra, duke bërë krenarë për këto trofe të arritura qytetin, sportistët, trajnerët dhe drejtuesit. Por sukseset e sportistëve shkodranë nuk kanë munguar edhe në veprimtaritë ndërkombëtare, siç janë përfaqësimet dinjitoze të atletit rekordmen, Izmir Smajlajt, dhe peshëngritësit titullar, Erkand Qerimajt. Klubi shumësportësh "Vllaznia" ka në përbërje 20 ekipe: Basketboll (meshkuj të rritur e të rinj dhe femra të rritura e të reja), Volejboll (meshkuj të rritur e të rinj, femra të rritura e të reja), Boks (meshkuj të rritur), Atletikë (meshkuj të rritur), Çiklizëm (meshkuj të rritur), Futboll (femra të rritura), Gjimnastikë (femra të rritura), Hendboll (meshkuj të rritur), Mundje (meshkuj të rritur), Not (meshkuj të rritur dhe femra të rritura), Peshëngritje (meshkuj të rritur), Ping pong (meshkuj të rritur), Shah (meshkuj të rritur). Suksesi shkodran qëndron te dashuria dhe respekti për sportin, dëshira për të bërë gjithçka në të gjitha sportet.