Kievo shënjestron Abazajn, Partizani tenton një “Bob”

Mesfushori Jusuf Bob mund të vijë në formë huazimi nga veronezët

Ka kaluar gjysma e afatit kohor të mer katos së dimrit dhe Partizani ende nuk i ka realizuar objektivat për janarin. Në prononcimin e fundit nga Antalia, ku ekipi po kryen minifazën përgatitore, trajneri Sulejman Starova paralajmëroi se ekipi do të përforcohet edhe me tre lojtarë të tjerë. Sipas trajnerit, synimet kanë të bëjnë me afrimin e një mbrojtësi (i paspecifikuar pozicioni), një mesfushori (që mendohet të jetë fantazist), si dhe i një sulmuesi "pykë". Ndonëse po punohet për këto objektiva, stafi teknik është i detyruar të vijojë punën me grupin që ka në dispozicion. Burime pranë njerëzve që po bëjnë merkaton e Partizanit, kanë bërë me dije për "Panorama Sport" se një nga emrat që po diskutohet nga të kuqtë është një mesfushor i Kievos. Në këtë rast, është një çështje "bobash", pasi nëse realizohet Jusufa Bob (emri i mesfushorit) do të vihet nën urdhrat e trajnerit Sulejman Starova, i cili gëzon epitetin "Bobi". Jusufa Bob është lojtar në pronësi të klubit italian të Seria A, njëkohësisht pjesëtar i kombëtares së Gambias, por që Kievo e ka huazuar në sezonet e fundit. Mësohet se bisedimet për 21-vjeçarin janë në fazën fillestare, por të kuqtë kërkojnë që marrëveshja për Bobin të mos jetë si në rastin e Kaleb Ekubanit, ku i përfituar doli klubi italian. Dihet që sulmuesi italo- ganez u promovua te Partizani, por përfitimin për shitjen e sulmuesit e mori Kievo, që zotëronte kartonin. Ish-klubi i Ekubanit e afroi Bobin në moshën 19-vjeçare, por në dy vitet e fundit e ka huazuar në klube të niveleve të ulëta në Itali. Së fundmi, Jusufa Bob është huazuar te Rexhiana në Serinë C dhe pozicioni i tij natyral është mesfushor qendre. Ashtu si sulmuesi i Skënderbeut Ali Soue, i cili gjithashtu është në pronësi të Kievos, edhe Bob është pjesë e kombëtares afrikane të Gambias. Mesfusha është reparti më i mbipopulluar te Partizani, por drejtuesit janë të prirë për të afruar elementë cilësorë, që i shërbejnë edhe së ardhmes. Pretendohet se nga janari po nis një revolucion i ri, me shpresat që rezultatet të "korren" në edicionin pasardhës. Luçiano Moxhi vendos për afrimet e merkatos aktuale, ndaj, nëse lojtari nuk gëzon pëlqimin e tij, ka pak shanse që të vishet i kuq.