Nga Hakani, Suli e deri te Begaj, ja tërmetet e mëdha

Histori i peshëngritësve shqiptarë të dopuar

Peshëngritja shqiptare, sporti më elitar kuqezi në arenën ndërkombëtare, vazhdon të marrë goditje të forta njëra pas tjetrës nga viti në vit. Ngjarje të rënda e të shëmtuara kanë rënduar jo vetëm mbi figurën morale dhe emrin e klubeve sportive, por edhe të sportit tonë, në ballafaqimet e përfaqësimet të veprimtarive ndërkombëtare. Këto ngjarje nuk kanë ardhur papritmas. Ato nuk ndodhën spontanisht e rastësisht. Përkundrazi, janë akumuluar në klube të ndryshme sportive, akumulim që shpjegohet dhe argumentohet me punën shumë të dobët edukative dhe liberalizuese, që zhvillohet konkretisht në këto klube si dhe në federatat sportive.

Ish- peshëngritësi Ferid Berberi, i lindur më 6 dhjetor 1946, në Tiranë, një sportist që theu 37 rekordet kombëtare të peshëngritjes dhe kampion kombëtar për 7 vite (19611973), ish-Sekretar i Përgjithshëm i Federatës Shqiptare të Peshëngritjes, por dhe trajner i Klubit të Peshëngritjes Dinamo, pas ngjarjeve të dopingut të sportistëve tanë më 2012ën, në rolin e specialistit, kishte rreshtuar 4 arsye të përdorimit të dopingut në Shqipëri nga sportistët tanë në atë kohë:

1. Ka humbur stërvitja shkencore

2. Nuk ka një disiplinë të fortë në përgatitjen e peshëngritësve

3. Nuk ka zbatim korrekt të kritereve dhe parimeve në seancat stërvitore, nën kontrollin e rreptë të mjekut sportiv.

4. Mungon fushata sensibilizuese për ndërgjegjësimin e sportistëve.

Dhe kjo modë e shëmtuar e substancave të ndaluara u fut bindshëm edhe në Shqipëri. Më poshtë do ju njohim me rastet e ndodhura në këtë sport gjatë historisë së zhvillimit të këtij sporti në vendin tonë. Para viteve '90 deri në 2000

Mirjan Hakani. Një tjetër rast i shëmtuar dhe i paprecedent për natyrën e sportistit dhe të sportit ka ndodhur me peshëngritësin Mirjan Hakani të klubit sportiv "17 Nëntori", i cili gjatë zhvillimit të Kampionatit Europian të peshëngritjes të vitit 1986, "Francë 1986", u ndëshkua nga Federata Europiane e Peshëngritjes për përdorim dopingu (drogë) për dy vite (10 nëntor 1986-1988).

Pas viteve 2000

VITI 2005 - Ilir Kafarani. Ish- te një nga të parët shtangistë shqiptarë që rezultoi me përdorim dopingu, në fillimin e viteve 2000, kur më 2005-n ai u dënua me masën ekstreme për të mos garuar përjetësisht në këtë sport.

VITI 2007 - Isa Bala. Në vitin 2007 rezulton me përdorim të dopingut, shtangist ky që u dënua me 5 vjet (8 korrik 2004-2009)

FETIJE KASAJ - Një nga ish-yjet e shtangës për femra. Ajo rezultoi pozitive në testin antidoping në vitin 2007 duke u pezulluar dy vjet nga aktivitetet kombëtare dhe ndërkombëtare (18 prill 2007 - 2009).

Pasi e mbaroi dënimin, u kthye përsëri, por më pas ka dështuar në të gjitha aktivitetet.

MIRJAN LOZI - Rezultoi me përdorim të substancave të ndaluara duke u pezulluar për dy vite (8 korrik 207-2009).

VITI 2011 - Shqiponja Brahja: Ishte 38 vjeç, kur mori pjesë në kampionatin botëror të Parisit, më 2011, duke zënë vendin e 7-të, pasi arriti të ngrinte 171 kilogramë në dygarësh. Pas kësaj gare ajo ka rezultuar pozitiv me substancën epitestosteron (T/E 65). U dënua me pezullim për 2 vite (5 nëntor 2011-2013).

VITI 2012 - Ilirjan Suli: Ky është dhe sportisti i parë që është kapur me doping gjatë një kontrolli në shtetin shqiptar të organizuar nga Agjencia Ndërkombëtare e Antidopingut, më 4 prill 2012. Sportisti shqiptar renditjen më të mirë e kishte në vendin e 5-të gjatë Olimpiadës së "Sidnej 2000". Në 2012 ai u gjend me substancën "methandienone". U pezullua 2 vite (4 prill 2012 - 2014).

ERKAND QERIMAJ: Festa e Erkand Qerimajt pasi fitoi titullin "Kampion Europe" në Antalia, në peshën 77 kilogramë, zgjati vetëm pak javë sepse në testet antidoping, pas këtij kompeticioni, shtangisti rezultoi pozitiv duke përdorur substancën "methylhexaneamine" dhe u pezullua 2 vjet nga të gjitha aktivitetet (12 prill 2012-2014).

HYSEN PULAKU: Është peshëngritësi i parë shqiptar që rezultoi pozitiv në testin antidoping në Lojërat Olimpike

"Londër 2012". Ai rezultoi me substancën "hidrozystanozolol". Për këtë ai u pezullua për 2 vite (27 korrik 2012-2014)

VITI 2013 - Briken Calja: Është pezulluar 2 vite, pas rezultimit me përdorim të substancave "Androsterone" duke u pezulluar për periudhën (22 qershor 2013 - 2015).

VITI 2014 - Romela Begaj: Del pozitiv edhe pas në testit B, për përdorim të substancave të ndaluara "Stanozolol" pas shpalljes kampione në Botërorin "Kazakistan 2014", atëherë Begaj pati një dënim pezullimi 2-vjeçar nga çdo lloj aktiviteti ndërkombëtar (1 dhjetor 2014-2016).

DANIEL GODELLI: Del pozitiv edhe pas në testit B, për përdorim të substancave të ndaluara, pjesëmarrës në kampionatin Botëror "Kazakistan 2014". Paneli dëgjimor e shpalli fajtor sepse ai kishte përdorur substancën "Stanozolol". U dënua me pezullim për dy vite (10 dhjetor 2014-2016).

ÇERÇIZ ARBËRI: Del pozitiv gjatë Lojërave Olimpike, pasi kishte përdorur substancat "Testosterone, Epitestosterone", të cilat figurojnë si substanca të ndaluara. Ai u pezullua për dy vjet (9 maj 2014 - 2016)

HYSEN PULAKU: Del pozitiv edhe pas në testit B, për përdorim të substancave të ndaluara ( Stanozolol), u pezullua për 8 vite, pasi u konsiderua si një rast i përsëritur (10 dhjetor 20142022). A.Dushku