Zmijani: Afrimet më të mira se në verë, duhen miqësore
Hysen Zmijani vlerëson merkaton e Vllaznisë. Ish-futbollisti i shkodranëve, por edhe Kombëtares shqiptare, deklaron se afrimet e bëra në janar janë shumë herë më të goditura se ato të verës. "Mendoj që lojtarët e ardhur në merkaton e janarit te Vllaznia janë më cilësorë se edhe ata që u afruan në verë. Dihet që në dimër është e vështirë për të gjetur elementët e duhur, por me dëshirën e trajnerit u afruan të mirë. Gjoka kishte vendosur 'alarmin' për mbrojtjen, por besoj se tashmë ekipi është përforcuar mirë dhe është realizuar dëshira e tij për një mbrojtje më të mirë", u shpreh fillimisht ai. Një problem për Zmijanin mbeten miqësoret, ndaj paralajmëron se duhet të gjenden kundërshtarë të fortë, pasi kjo është forma e vetme për të parë gjendjen e grupit. "Vllaznisë i mungojnë ndeshjet miqësore. Vetëm aty shihet më mirë ekipi, pra, kur zbret në fushën e lojës. Në një test evidentohen pikat e dobëta dhe të forta, ndaj e shoh domosdoshmëri që skuadra të përballet me kundërshtarë të fortë. Natyrisht që nuk mund ta quaj të pavlefshme ndeshjen me Vllazninë B, por që të matësh forcat, duhet minimalisht që kundërshtarët të militojnë në Superiore. Ndonjëherë ne e neglizhojmë këtë pjesë, ndoshta edhe nga mungesa e alternativave. Gjithsesi, duhen gjetur ekipe të forta në Mal të Zi, ekipe që i përafrohen nivelit të Vllaznisë. Në të kundërt të zgjedhin rivalë në Tiranë, Vlorë apo diku tjetër për të pasur ndeshje të mirëfillta miqësore. Përpara rinisjes së kampionatit duhen ndeshje të tilla sepse aty shihen lojtarët dhe aty japin maksimumin", theksoi ish-mesfushori i kuqebluve. Ai vlerësoi edhe rritjen e konkurrencës, pasi tashmë Vllaznia ka edhe një stol të mirë. "Edhe stolin e rezervave nuk e kemi keq. Pra, është krijuar një farë konkurrence. Nuk mund të themi më se s'kemi ekip, është krijuar një bërthamë shumë e mirë dhe shpresojmë që gjithçka të nisë mbarë që nga Kukësi", përfundoi ish-lojtarit i kuqebluve.