Dedja konfirmon: Përgjini dhe Khatsukov janë të Lushnjës
Ikën rusi Simonov, edhe Allkanjari në provë
Hysen Dedja konfirmon Leonard Përgjinin dhe Khasan Khatsukovin. Në një deklaratë të dhënë për "Panorama Sport", trajneri u bën thirrje drejtuesve që të mbyllin kontratat me sulmuesin lezhjan dhe mesfushorin rus. Dimitri Simonov nuk e ka marrë OK-in e stafit teknik, ndaj edhe është larguar nga resorti "Tropikal". Sakaq, në provë është rikthyer sulmuesi lushnjar i Naftëtarit, Arbër Allkanjari. "Vazhdojmë stërvitjen me dy seanca në ditë. Impenjimi i futbollistëve është maksimal dhe kjo më gëzon. Nesër (sot), duke qenë se do të zhvillojnë miqësoren e tretë për këtë fazë, atë ndaj Dinamos, kemi menduar që të zhvillojmë vetëm një seancë paradite. Për sa u përket ndeshjeve miqësore, kam përzgjedhur kundërshtarë të një niveli më të dobët për të parë dhe më mirë futbollistët që kam në provë. Mund të konsiderohen pjesë e Lushnjës, Përgjini dhe Khatsukov, ndërkohë që kam përsëri në provë Allkanjarin. Nesër ( sot) kemi testin me Dinamon, ndërsa miqësorja e fundit do të jetë me Erzenin në Shijak. Duke qenë se e rifillojmë kampionatin në transfertë, kemi menduar që ta luajmë jashtë testin e fundit", deklaroi trajneri Dedja.
FUSHA - Fusha e stadiumit "Roza Haxhiu" po ripërtërihet. Në këtë periudhë, kur në impiantin lushnjar nuk shkel kush, punonjësit e klubit kanë ndërhyrë për të riparuar dëmet që la zhvillimi i procesit stërvitor në fushën e stadiumit gjatë muajve nëntordhjetor. Për gazetën "Panorama Sport", drejtori i KF Lushnja 1930 sh. a, Vladimir Hajdari, shprehet: "Pas largimit të ekipit të Lushnjës në minifazën përgatitore dimërore, fusha e stadiumit të Lushnjës është kthyer në gjendje optimal. Fusha nuk do të përdoret më për ekipet e Akademisë, për ndeshjet e futbollit të moshave. Do të zbatohet me rigorozitet urdhri i FSHF- së, që ndalon kategorikisht zhvillimin e seancave stërvitore në këtë fushë". Alban Alushi