Teuta kërkon “bomber”, dy të huaj stërviten në Durrës
Mungesa e një sulmuesi shqetëson stafin teknik
Teuta dje ka zhvilluar vetëm një seancë stërvitore, si pasojë e mbingarkesës që kanë pasur gjatë kësaj periudhe. Bregdetarët zbritën në terren pasdite me trajnerin Stavri Nica që, pasi i përgëzoi për impenjimin dhe seriozitetin, u vuri në pah gabimet që kishin bërë në miqësoren e fundit me Osmaniyesporin. Edhe pse durrsakët fituan 1-0 në këtë ndeshje, 63-vjeçari kishte sërish kritika për lojtarët. Mungesa e një sulmuesi shqetëson stafin teknik që presin nga drejtuesit një lojtar "big". Ndërkohë Cheick Tidiane Tambadu po vijon stërvitjen me ekipin U-19 të Teutës nën drejtimin e Gentian Begejas. Së bashku me të po stërvitet edhe Reza Karimi, i cili nuk mundi t'i bashkohej ekipit në Turqi, për shkak se nuk u pajis dot me vizë. Durrsakët do të qëndrojnë edhe dy ditë të tjera në Antalia, teksa të premten në mbrëmje do të kthehen në Durrës për t'i vijuar këtu përgatitjet për ndeshjen e radhës në kampionat me Lushnjën. Gjatë qëndrimit në Turqi, Teuta do të zhvillojë edhe një tjetër miqësore. Kundërshtari i radhës është FC Atyra dhe takimi do të zhvillohet më 18 janar, ora 17:00 (15:00 ora shqiptare). Testi i tretë për bregdetarët është një ekip dinjitoz që militon në Premier Ligën e Kazakistanit, niveli më i lartë i futbollit në këtë shtet. Në testin e fundit, Nica do të mundohet të kristalizojë formacionin që do të përdorë në pjesën e mbetur të kampionatit, edhe pse duke u bazuar në ndeshjet miqësore, bregdetarët Bilali, Gjeorgevski dhe Mustafov janë piketuar si titullarë. Dilema ka sa i përket sulmuesit nga Mali, i cili gjatë kësaj periudhe po stërvitet me ekipin e të rinjve. Numri një i pankinës ka shfaqur haptazi dëshirën edhe për një sulmues duke e kaluar "topin" te drejtuesit. Drilon Xhepollari