Salillari takim për Tomorin, shfaqet edhe Zeqo
I pranishëm mund të jetë edhe ish-presidenti i Skënderbeut
Një ndër kompanitë e mëdha të ndërtimit në vend, "Salillari sh.a" është gati të hyjë në bisedime me Bashkinë e Beratit për të negociuar blerjen e 76% të aksioneve të klubit të Tomorit. Një gjë e tillë është konfirmuar për "Panorama Sport" nga njerëz që janë afër presidentit të këtij firme, z.Pëllumb Salillari. Iniciativa e ndërmarrë nga tifozët beratas disa ditë më parë duket se tashmë po jep sinjalet e para pozitive në të mirë të skuadrës, ku mësohet se, brenda ditës së premte, mund të ketë një takim mes zyrtarëve të Bashkisë së Beratit dhe përfaqësuesve të kompanisë në fjalë. Javën e shkuar, "Panorama Sport" ka pasur një bisedë telefonike me z.Salillari, i cili ka shprehur se momentalisht nuk e kishte mendjen aspak te futbolli, për shkak të problemeve shëndetësore që kishte një prej pjesëtarëve shumë të rëndësishëm të familjes së tij. Mirëpo, gjatë këtyre ditëve, Salillari mendohet ta ketë shqyrtuar me kujdes letërkërkesën e tifozëve në drejtim të tij, duke bërë që të ndryshojë mendim në lidhje me propozimin që i është bërë.
TAKIMI - Burime pranë biznesmenit Salillari kanë bërë me dije se ky i fundit tashmë është i interesuar për të investuar edhe në fushën e futbollit në qytetin e tij, në mënyrë që skuadra të rikthehet në nivele të larta dhe
qytetarëve t'u rikthehen emocionet e lojës së bukur. Megjithatë, në blerjen e aksioneve, jo gjithçka do të varet nga kompania në fjalë, e cila do të hedhë hapin e saj për të zhvilluar negociata me bashkinë, që ka edhe paketën e plotë të aksioneve të klubit. Mësohet se në takim do të jenë dhe juristët e dy palëve, që do të diskutojnë edhe mbi terma financiare. I njëjti burim pranë z.Salillari konfirmon se objektivi është që të ndërtohet një skuadër që do të funksionojë në mënyrë profesionale dhe me një strategji të
klubeve europiane. Në rast se arrihet akordi, synohet që Tomori të jetë në nivelet e ekipit të Skënderbeut si në kampionatin vendës, ashtu edhe në Europë. Pritet që, në takimin mes bashkisë dhe përfaqësuesve të firmës "Salillari sh.a", të jetë edhe ishpresidenti
i Skënderbeut, Agim Zeqo. Nuk dihet nëse ky i fundit do të jetë i përfshirë në projekt, apo do të marrë pjesë në takim, për të treguar eksperiencën e tij në krye të skuadrës së Skënderbeut, një shembull suksesi që vazhdon edhe sot.