Klubi në garë me kohën, rrezikojnë talentet

Kur nuk ka mbetur edhe shumë kohë nga rifillimi i kampionatit, te skuadra e Apolonisë janë duke punuar për formatimin e ekipit në çdo drejtim. Brenda limiteve të buxhetit që kanë, të gjithë janë të shqetësuar për të bërë më të mirën në hapësirën e mbetur të kësaj merkatoje dimërore, që nga drejtori ekzekutiv Memalla, stafi teknik e me radhë. Kjo, pasi duan që, minimalisht, Apolonia të mbetet në pesëshen e parë të grupit. Primare për bardhejeshilët është ruajtja e kontingjentit aktual, paçka se klubi bazohet te shitja e talenteve. Por, një largim tjetër, veç Krasniqit në këtë moment, do të krijonte jo pak probleme në këtë skuadër. Apolonia, edhe në rastin më të keq, do përpiqet të zëvendësojë me zgjedhje brenda grupit hapësirat që mund të lihen bosh, çka u jep një sinjal të qartë lojtarëve në provë se duhet të bëjnë maksimumin e tyre. Sulmi ka alternativa Mihanën, Llambin, Dimon, si dhe të riun Gjata, ndonëse u është ofruar mundësi dhe Kumanaku e tetovari Bajrami. Por, nëse këta nuk bindin gjatë kësaj periudhe, Apolonia, siç e kanë deklaruar dhe drejtuesit, e kanë një zgjidhje rezervë me kosto financiare. Testimet e kësaj jave do të jenë definitive për të rinjtë në provë, por jo fundi i merkatos së Apolonisë. Pista të mundshme, të fshehura paksa për shkak të konkurrencës, janë edhe emra të tjerë nga skuadra kryesisht fqinje të kategorive të ndryshme. Gjithmonë bëhet fjalë për futbollistë të rinj dhe premtues në perspektivë, të vëzhguar me kujdes nga ndihmësit e trajnerit Kashami. Burime brenda klubit kanë bërë me dije se ka alternativa për çdo pozicion dhe do të veprohet në rast se do të jetë e nevojshme për të zëvendësuar të larguarit. Bujar Rama