Frikë nga Reali, Ikardit do t'i dyfishohet paga
Interi "në mbrojtje", bën gati rinovimin brenda shkurtit
Në kalendarin e drejtuesve të In terit është shënuar një takim, i fiksuar për muajin shkurt, pas mbylljes së merkatos "së riparimeve": mbledhje me familjen Ikardi për të diskutuar rinovimin e kapitenit zikaltër. Sipas informacioneve të "Premium Sport", shoqëria do synojë të dyfishojë klauzolën e shitjes prej 110 milionë euro (që vërtet vlen vetëm dy javët e para të korrikut, por me çmimet që qarkullojnë mbetet gjithsesi një rrezik) për të arritur në nivelet e Nejmarit: Maurito, me këtë marrëveshje, do përfitojë 8 milionë euro në vit me bonuse (për tani fitoj thuajse 5, me kontratën që i skadon në vitin 2021) për të mos peshuar te tavani i pagave.
"ALARMI" REAL - Ndërkohë, Reali i Madridit mban sytë nga argjentinasi: "Galaktikët" kanë nevojë urgjente për një profesionist të golit. Me këtë fakt po duhet të mësohet edhe presidenti Florentino Perez përpara rënies së Karim Benzmasë (mes të tjerëve), protagonist i një dështimi në gjysmën e parë të sezonit, me vetëm 5 gola të shënuar në 20 ndeshje: një mesatare prej 1 rrjete çdo 4 paraqitje, te Reali, vlen shumë pak. E nëse kampionët e Europës në fuqi, të cilët shumë shpejt mund të privohen edhe nga Kristiano Ronaldo (rrugës drejt Parisit), pavarësisht se me një ndeshje të prapambetur, ndodhen 19 pikë larg Barçës kryesuese, faji është edhe i "thatësirës" realizuese të sulmuesve madrilenë. E konfirmojnë edhe shifrat: 52 gola të katalanasve, 32 ato të "Los Blancos" (gjithmonë në La Liga). Ndaj Perez (por i pari Zidan) janë në kërkim "të dëshpëruar" të një goleadori që shënon 30 gola në vit dhe emri më i lakuar është momentalisht Ikardi. Por Interi me siguri nuk dëshiron ta humbasë një "xhevahir" pa luftuar, ndaj shkurti pritet të jetë muaji i rinovimit.
100 GOLA - Ndërkaq, ndaj Romës (ndeshjes së radhës për zikaltrit) mund të arrijë kuotën 100 gola në Serinë A: të dielën, në sfidën ndaj verdhekuqve, Mauro mund të bëhet pjesë e bomberave të Serisë A në shifër të trefishtë (e të mendosh që nuk ka mbushur ende 25 vjeç...).