Pakult ndryshon kampionët, ja si do bëhet formacioni
Trajneri austriak, me një skemë sulmuese
Kukësi shkarkoi trajnerin Mlladen Milinikoviç, për shkak të rezultateve jo të mira, pasi verilindorët nga ekipi kampion në fuqi dhe pretendent kryesor për rifitimin e titullit, tashmë janë larg objektivit. Edhe trajneri i ri, Peter Pakult, një emër me mjaft eksperiencë dhe në nivele të larta trajningu, nuk e ka përmendur kurrë fjalën titull, pasi realisht duket një mision i pamundur. Pakult ka zhvilluar një fazë përgatitore mjaft të mirë, ku ka marrë rezultate pozitive në Turqi, pikërisht fitore ndaj Kaiserisporit e Bursasporit, si dhe barazim ndaj gjigantëve të Fenerbahçes. Por, si ndryshoi Kukësi në pak ditë?
Ish- trajneri Milinkoviç përdorte më shpesh skemën 4-4-1-1, por edhe 4-2-3-1. Preferonte Koliçin në portë, Bujar Idrizin në krahun e djathtë, kapitenin Shameti dhe Hoxhën në qendër, si dhe Rrumbullakun në të majtë. Mesfusha ishte e përbërë me 5 lojtarë: Ethemi në të djathtë, Imami e Musolli në qendër, Elton Kale në të majtë. Pak më i avancuar luante Elis Bakaj, ndërsa në qendër të sulmit Sindrit Guri. Një skemë tjetër ka nisur të praktikojë Pakult. Austriaku e kaluar në 4-2-31, por edhe 4-4-2. Me përforcimet e janarit, Kukësi pritet të ndryshojë vetëm lojtarët në fushë dhe jo skemën. Me ardhjen e Irakli Dzaria, Filip Zderic, Donjet Shkodrës, e së fundmi Dejan Glavicës, te Kukësi do të ketë luftë në mesfushë. Koliçi do të jetë në portë, Zderiç në të djathtë në vend te Rrahman Hallacit, pavarësisht se Idrizi ka treguar një formë mjaft të mirë dhe lufta për vendin e titullarit do jetë e fortë. Në qendër do të luajnë Shameti e Alla, ndërsa Rrumbullaku do të jetë në garë me Imamin për linjën e majtë. Mesfusha pritet të ndryshojë shumë, pasi Shkodra e Musolli do te mbulojnë dyshen shkatërruese, por gjeorgjiani Dzaria është gjithashtu kandidat potencial për formacionin. Glavica në të djathtë të mesfushës, Bakaj në qendër, Kale në të majtë, si Guri në majën e sulmit plotësojnë ekipin e Pakult, që mund të ndryshojë skemën në varësi të lojës. Me plot pesë lojtarë ofensivë nga minuta e parë, austriaku kërkon që të injektojë një futboll total te Kukësi. Pra, mbrojtjen e nis që nga sulmi, teksa kërkon presing që nga Bakaj dhe gjithashtu Guri. S.Sulozeqi