Gjobë Starovës dhe Trashit, Partizani gjen sulmues
Klubi penalizon trajnerin se foli pa leje, Krasniqi: “Bobi” i paqëndrueshëm, Olsi Rama i sinqertë”. Vjen Emran Ramadani nga Renova
Përplasja mes trajner it Sulejman Starova dhe mesfushorit Lorenc Trashi, një ditë para mbylljes së fazës përgatitore në Antalia, është analizuar dje nga drejtuesit e lartë të klubit dhe në përfundim, kanë marrë edhe masa. Në dallim nga problematikat e shkuara, mësohet se në këtë rast e kanë pësuar të dy palët, si trajneri dhe mesfushori. Pa dyshim, ndëshkimi më i rëndë ka shkuar për Lorenc Trashin, i cili përveç gjobës monetare, do t'i duhet që për disa kohë të qëndrojë larg ekipit të parë, duke u bërë pjesë e Partizanit B. Për herë të parë, një klub shqiptar ka vendosur që të gjobisë edhe trajnerin, për debatin e shoqëruar me lojtarin. Përplasja mes Trashit dhe Starovës ndodhi pas zëvendësimit të lojtarit në një miqësore të paparalajmëruar, ndaj gjysmëamatorëve gjermanë të Berliner AK 07. Të dy palët, për "Panorama Sport", kanë dhënë versionin e tyre të ngjarjes. Një ditë pas kthimit në Shqipëri, drejtuesit e klubit, ku bën pjesë edhe presidenti Demi dhe drejtori Rama, janë mbledhur dhe pasi kanë analizuar me imtësi rrethanat e ngjarjes, kanë marrë masat respektive. Prononcimi pa leje për mediat ka qenë një nga arsyet penalizuese në këtë debat publik. Për sa i përket shqyrtimit të sherrit mes trajnerit dhe mesfushorit, klubi nuk ka dhënë asnjë informacion, si për ngjarjen, por edhe për masat e ndërmarra. Zakonisht gjoba minimale te Partizani është 2 mijë euro, shifër e cila mendohet se i është faturuar trajnerit Starova. Ndërsa penalizmi i lojtarit ka qenë dyfish, pasi përveç sherrit, i duhet të paguajë edhe shkeljen e rregullores së klubit duke u prononcuar pa leje për mediat. Pas përplasjes me trajnerin Trashi, pohoi se e ka mbyllur përfundimisht çështjen e bashkëpunimit me Starovën, ndaj përkohësisht, lojtari është "internuar" te Partizani B, që militon në Kategorinë e Dytë, kampionat i cili rifillon më 11 shkurt. Klubi nesër nis përgatitjet për sfidë e parë me Flamurtarin dhe aty do të vërtetohet masa e ndërmarrë nga klubi për Lorenc Trashin. Gjobat nga drejtuesit e klubeve për lojtarët konsiderohen të zakonshme, por Partizani ka vendosur një standard të ri në këtë rast, duke mos kursyer edhe trajnerin, kuptohet duke u nisur nga lajmet që vijnë nga ajo që ka ndodhur ne mbledhjen e djeshme te "demat".