Qetësohen te Skënderbeu, Nespor rikthehet në Poloni

Martin Nespor largohet zyrtarisht nga Skënderbeu dhe kthehet te Zaglebie Lubin. "Divorci" ka marrë formë të prerë dhe lajmi në fjalë konfirmohet nga vetë polakët. Rikthimi i Martin Nespor në Poloni ishte e vetmja mundësi. Sulmuesi kishte plotësuar numrin dy të transferimeve brenda një sezoni dhe, sipas rregullores së prerë të FIFA-s, nuk mund të luajë në tri skuadra. Shansi i vetëm pra ishte rikthimi te skuadra ku nisi edhe sezonin. Mësohet se kontrata është zgjidhur me konsensus dhe lojtari ka dhënë OK-in e prishjes së marrëveshjes, pasi është paguar deri në muajin dhjetor. Të gjitha detajet e këtij transferimi i jep vetë drejtori sportiv i klubit polak, Darius Motala, i cili thekson se kanë arritur akord me Skënderbeun për të mbyllur kështu marrëveshjen e huazimit. "Martin Nespor është rikthyer në ekipin tonë. Karriera e tij në Shqipëri nuk shkoi sipas parashikimeve, madje lojtari u dëmtua. Martinit i duhet që të rikuperohet, ndaj ne vendosëm që huazimi i tij të ndërpritej pas 6-mujorit të parë. Këtë vendim e morëm në dhjetor, pasi biseduam edhe me Skënderbeun dhe analizuam kushtet e kontratës, ndaj vendosëm që të rikthehemi te Zaglebie Lubin. Edhe vetë sulmuesi çek ishte i vendosur për t'u rikthyer në Poloni", u shpreh. Nespori rezultoi një dështim te Skënderbeu, por kjo edhe për shkak të dëmtimit. Ai nuk mundi kurrë që të shfaqte veten, edhe pse erdhi me "bujë" të madhe në Korçë. Ai përfitonte jo pak, por 12 mijë euro në muaj, një kosto shumë e lartë për klubin, në një kohë që ai ka marrë vetëm 11 minuta në kampionat, 136 në Kupën e Shqipërisë dhe 22 në arenën europiane. Ndërkohë klubet kishin arritur fillimisht një marrëveshje për huazim me të drejtë blerjeje, por duke qenë se gjërat nuk shkuan sipas planeve, lojtari u largua që pas 6 muajve nga Korça.