Vllaznia, vuajtje për një gol
Shkodranët mundin Tërbunin në miqësore, ndërsa shpërdorojnë shumë raste për shënim
Vllaznia ka fituar edhe miqësoren e dytë të zhvilluar kësaj here ne shtëpinë e vet përballë Tërbunit. Shkodranët kanë triumfuar minimalisht 1-0 me një gol të Erald Çinarit në pjesën e dytë të takimit. Tekniku i ekipit të Vllaznisë, nga ana e tij, ka nisur këtë takim me formacionin, që pritet të startojë edhe ndeshjen me Kukësin. E vetmja risi e këtij formacioni, por jo për t'u habitur, është aktivizimi i mbrojtësit të ri, Samet Ruqi, në pozicionin e mbrojtësit të djathtë. Nga ana tjetër, është thuajse formacioni që ishte programuar me përjashtim të Orelesit, që ende nuk shihet në gjendjen e tij fizike më të mirë. NDESHJA
Një takim që ka nisur me sulme dhe kërcënim të portës mike nga ana e lojtarëve të Vllaznisë. Lika që në minutën e 5-të kërcënon portën e Rexhepit. Pa kaluar as dy minuta, një tjetër gjuajtje e fortë e Krymit, pritet nga portieri shkodran i Tërbunit. Është sërish Krymi që në të 20-ën minutë kërcënon portën mike, por pa gjetur rrugën e rrjetës. Mirëpo, nuk ndalet këtu furia e lojtarëve të Vllazninë deri në fund të pjesës së parë. Sukaj e më pas edhe Çinari, kanë gjetur gatishmërinë e gardianit të portës mike. Pjesa e dytë flet sërish për Vllazninë. Kur kanë kaluar vetëm 9 minuta nga starti i pjesës së dytë të takimit dhe ka qenë Erand Çinari, që merr një top të saktë pas shpinës së mbrojtjes dhe i vetëm me Rexhepin, nuk gabon duke shënuar dhe mposhtur portierin mik. Trajneri Ernest Gjoka ka kryer edhe disa lëvizje
në formacion duke aktivizuar Selimajn, Orelsin e Kalanë. Madje, në minutat e kësaj pjese, edhe Sukaj dhe Kalaja kanë qenë pranë shënimit të golave të tjerë. Vllaznia, pavarësisht fitores, ka shpërdoruar shumë mundësi të tjera shënimi. Ndërkaq,
mbrojtësi me të ardhme, Enes Isufi, ka të njëjtin fat si i riu shkodran Belajd Pusi. Ai nuk u grumbullua me Vllazninë në fazën përgatitore në Ulqin, por është Kombëtarja e të rinjve U-19, e cila ka thirrur mbrojtësin shkodran në një grumbullim për një
ndeshje miqësore në Elbasan, që do të jetë pas pak ditësh. Vllaznia nuk e grumbullon, por e thërret Kombëtarja dhe sërish kemi një paradoks, ndërsa koha na ka dhënë të drejtë lidhur me mosgrumbullimin e këtyre të rinjve në fazën përgatitore.