Katër afrime, ja si ndryshon Besëlidhja
Guineasit mbeten shumicë, ekipi forcon repartin ofensivë
Besëlidhja është në kulmin e përgatitjeve në kuadër të fazës përgatitore mes fazash, ku deri tani, stafi teknik është përqendruar në dhënien e ngarkesave fizike futbollistëve. Merkatoja e janarit ka mbi 10 ditë kohë dhe Besëlidhja tani ka nis lëvizjet intensive, ku pritet t'i bashkohen Bekim Dema dhe Arsen Hajdari, ky i dyti është i njohur këtu në Lezhë, pasi ka luajtur sezonin 2015- 2016. Pritet që këta dy futbollistë t'i bashkohen skuadrës në stërvitje deri në fundjavë, gjithashtu priten edhe të tjerë. Ndërkaq, dy lojtarë janë zyrtarizuar tashmë si pjesë e ekipit për sezonin në vazhdim, mesfushori Bekim Erkoçeviç dhe sulmuesi Kosta Bajiç. Në këtë mënyrë, janë katër lojtarë deri tani të afruar në merkato te Besëlidhja. Nga futbollistët e huaj, që sot luajnë me Besëlidhjen, komuniteti më i madh është ai i guineasve, ku dy janë titullarë, mesfushori me tipare sulmuesi, Oumar Turad Kamara, dhe mbrojtësi Olivier Dore, ndërsa Baou Bangoura, i cili është dënuar 8
ndeshje nga Komisioni i Disiplinës nuk i shërben më skuadrës, ndaj është drejt largimit. Ndërsa, Çeick Konte gjysmën e parë të sezonit është aktivizuar pjesërisht.
NDRYSHIMET - Sulmuesi Kristian Frroku që gjysmën e parë të sezonit, ndonëse nuk
i ka luajtur të gjitha ndeshjet deri në fund, pritet që gjysmën e dytë të sezonit, të mbetet kolegu i Kosta Bajiçit në sulm së bashku me Spartak Ajazin. Në repartin e mbrojtjes Besëlidhja ende nuk ka bërë ndonjë ndryshim dhe ka gjasa që të mos ketë, pasi stafin teknik e kanë bindur Edison Ndreca, Kledi Dibra, Olivier Dore, Hysen Hidri dhe Niku Vocaj. Ndërsa reparti i mesfushës është përforcuar me shkodranin Bekim Erkoceviç, që sapo ka firmosur kontratën për t'iu bashkuar Samet Hepajt, Issak Kamarasë, Rubin Met'hasanit dhe Oumar Turad Kamarasë. Me largimin përfundimtar të Elson Demit, porta i është besuar shkodranit Samet Bajri dhe zëvendësit të tij, lezhjanit Andi Jaku. Ndërkaq, skuadra vazhdon normalisht fazën përgatitore dhe synon që të jetë një ekip më rezultativ në vazhdim.