Egnatia bëhet e frikshme, mund edhe Bylisin
Rrogozhinasit tregojnë forcën, ballshiotët i dënon Shoshi
Egnatia nuk ndalet në miqësore. Të besuarit e Vladimir Gjonajt kanë arritur të thyejnë Bylisin në sfidën e luajtur dje në një nga fushat e kompleksit në Pezë. Rrogozhinasit fituan 1-0 me golin e Anthony, ndërsa portieri Haremi i priti një 11-metërsh mbrojtësit të Bylisit, Mariglen Shoshi. Pavarësisht se takimi luhej në Pezë, në shkallët e kompleksit nuk munguan edhe shumë tifozë rrogozhinas, që kishin udhëtuar enkas për të parë nga afër skuadrën e tyre të zemrës. Në ndryshim nga testi i dy ditëve më parë me Apoloninë, tekniku Gjonaj kishte rikthyer si titullar gardianin lushnjar, Haremin.
NDESHJA - Që në minutat e para, rrogozhinasit u panë më aktivë në fushë dhe më të saktë në veprime. Ndërsa ballshiotët nuk arritën të përshtaten me terrenin dhe të dalin në lojën e tyre më të mirë. Pas dy rasteve të humbura me Osinakin e Milen, në
minutën e 11-të do të vijë dhe goli i parë i takimit me autor mesfushorin nigerian Anthony, që gjuan bukur brenda zonës pas një krosimi të marrë nga krahët. Minutë pas minute, rrogozhinasit fitojnë dukshëm terren dhe mund të kishin shënuar golin e dytë nëse do të ishin
treguar më të vëmendshëm në finalizim. Minuta e 32-të do të sjellë një penallti për miqtë dhe ekzekutimin e merr përsipër kapiteni Shoshi, por pret gardiani Haremi. Te Bylisi nuk ka qetësi dhe humbin mundësinë më të mirë për të barazuar rezultatin. Pjesa e dytë vijoi me
shumë zëvendësime nga të dy trajnerët, çka solli edhe rënien e tempit të lojës në përgjithësi. Gjithçka u përqendrua në mesfushë me Egnatian, që i afrohej zonës ballshiote më shpesh, por pa rrezik. Deri në fund, gjithçka mbeti e pa ndryshuar. Aldo Buzi