PD shpërthen ndaj Finos: E do FSHF-në lavatriçe të Ramës

I menjëhershëm ka qenë reagimi i Partisë Demokratike pas denoncimit të kandidatit për kreun e FSHF-së, Bashkim Fino. Nga selia blu kanë ardhur një mori akuzash për deputetin e Partisë Socialiste. Sipas zyrës për shtyp të PDsë, Fino është vegël e kryeministrit Edi Rama dhe se kërkon të kthejë institucionin e futbollit shqiptar në një lavatriçe të Olsit, duke iu referuar këtu vëllait të kreut të qeverisë, i cili aktualisht është drejtor i klubit Partizani.

REPLIKA - "Partia Demokratike përgënjeshtron si të pavërtetë deklaratën e kandidatit të PS-së për kreun e Federatës Shqiptare të Futbollit, Bashkim Fino. Është shpifje ajo çfarë Bashkim Fino e tregon si shqetësim, se kreu i opozitës ka ndërhyrë në Gjykatën e Tiranës për të ndikuar në mënyrë të paligjshme procesin e zgjedhjeve në Federatë. Në vend të kësaj shpifjeje, Bashkim Fino duhet të shqetësohej se gjykatat janë nën presionin e vazhdueshëm të bosit të tij, Edi Ramës dhe po lirojnë nga burgu dhe nga fajësia kriminelët, më të cilët Rama ndan pushtetin, si Lul Berishën, Emiljano Shullazin, trafikantët e kokainës së "Xibrakës", Armando Prengën e Mark Frrokun. Bashkim Fino nuk shqetësohet për këtë, sepse ka pranuar të jetë vegla e Edi Ramës, që përveç prokurorisë, gjykatave, policisë e krimit, të kapë edhe Federatën e Futbollit. Ai është pjesë e një farse politike, që ka për qëllim të kthejë Federatën Shqiptare të Futbollit në lavatriçe të pastrimit të parave të pista të Edi dhe Olsi Ramës si dhe kriminelëve më të cilët mbajnë pushtetin. Lulzim Basha dhe Partia Demokratike nuk ka asnjë mjet për të ndikuar përveç sheshit! Më 27 janar Lulzim Basha do të jetë në shesh së bashku me mijëra demokratë e socialistë të ndershëm! Për këtë shqetësohu Bashkim!", citohej dje në reagimin e zyrës për shtyp të Partisë Demokratike të Shqipërisë.