Kolarov ndez sfidën: Naingolan? Shënon dy gola dhe vendos paqen...
"Fitojmë me Interin dhe vendosim gjithçka në vend. Në mes katër të parave do të renditemi me siguri. Për merkaton, megjithatë, flet Monçi". Dy ditë nga sfida me Interin (dje; nesër ndeshja), i ka takuar Aleksandar Kolarovit të përballet me temat që u përkasin javëve të ndërlikuara që po kalon Roma. Mbrojtësi serb, i transferuar në korrik, por i shndërruar menjëherë në lider të grupit, është mik i ngushtë me Xhekons, megjithatë nuk preferon të prononcohet për një largim të mundshëm të sulmuesit, me drejtim Çelsin e Antonio Kontes: "Nuk kemi folur këto ditë, e di që është kohë merkatoje, por edhe sikur të dija diçka nuk më takon mua të flas. Për këto kemi drejtuesin sportiv". FITORE DHE KTHESË - Kapitull i arkivuar, së paku për Kolarov, që preferon të përqendrohet tek objektivi minimal i Romës, pra mbërritja mes katër pozicioneve të para: "Skuadrat përpara nesh janë të forta, por duhet të arrijmë synimin tonë. Kemi bërë disa hapa falsë, të dielën (nesër) është ndeshja e duhur për të bërë kthesën".
RAXHA NË SULM? - Euzebio Di Françesko, gjatë orëve të fundit, pasi ka provuar Alesandro Florencin në "tredhëmbëshin" ofensiv, në të njëjtin rol ka testuar edhe Raxha Naingolanin, bashkë me Xhekon e El Sharauin (Defrel është stërvitur me grupin, Peroti gjithmonë jashtë; ndërsa për De Rosin do të vendoset brenda ditës së sotme) dhe mund të jetë kjo lëvizja surprizë kundër Luçiano Spaletit. Pikërisht për belgun, Kolarov tha: "Është i rëndësishëm për ne, e ka të qartë që ka gabuar (lidhur me polemikën e krijuar nga festa e shfrenuar të Raxhas) dhe nuk do e përsërisë më. Është një djalë fantastik dhe besoj se të dielën (nesër) me dy gola do vendosë paqe me tifozët dhe klubin".