Konte: Nuk flas për merkato, nëse klubi do të më ndihmojë...
Ndeshja e sotme në transfertë ndaj Brajtonit, është një mundësi për Çelsin për të mos iu ndarë grupit kryesues, pavarësisht se Mançester Siti duket i pandalshëm në rrugën e tij drejt titullit. Në konferencën e djeshme për shtyp, trajneri italian u përqendrua te merkato, duke e cilësuar si një shans përmirësimi, teksa deklaroi: "Nuk është mirë të flas për lojtarët e ekipeve të tjera, nuk do të tregoja respekt as për ata dhe as për futbollistët e mi. Merkato është e hapur dhe nëse do të ndryshojë ndonjë gjë, me siguri ju do ta merrni vesh të parët". I ngacmuar në lidhje me emrat e Xhekos, Bentekes dhe Krauçit, Konte evitoi pyetjen duke thënë: "Nëse doni, mund të flas për Moratën dhe Batshuain, të cilët kanë karakteristikat e tyre dhe më bëjnë të ndihem në rregull. Klubi i njeh nevojat, ndaj nëse dëshiron të më ndihmojë ok, përndryshe do të vazhdoj punën me grupin që kam në dispozicion, duke dhënë më të mirën tonë".
DËNIMI - Çelsi rrezikon të dënohet me pezullim për dy dritare transferimesh, për kontrata me futbollistë nën moshë (përflitet të jenë të paktën 25, por shifra mund të rritet), por çështja duket se e shqetëson relativisht trajnerin, i cili iu rikthye temës së teknologjisë. Sistemi VAR duket një domosdoshmëri për kampionatin anglez, me trajnerin që sugjeroi: "Nëse teknologjia përdoret si duhet, mund të na ndihmojë të kemi ndeshje pa gabime trashanike nga ana e arbitrave. Teknologjia është një mundësi e mirë, që i afrohet futbollit, por duhen përmirësuar mënyrat e përdorimit të saj, sepse nëse mbështetemi tek përdorimi aktual, atëherë na duhet të pranojmë se shumë aspekte lënë për të dëshiruar".
BRAJTON (4-4-1-1) Rajan; Bruno, Dafi, Dank, Bong; Knokërt, Stefëns, Proper, Març;
Gros; Mërrej Trajner: Kris Haton
ÇELSI (3-5-1-1) Kurtua; Kristensen, Rudiger, Azpilikueta; Moses, Bakajoko, Kante, Alonso; Hazard; Batshuai
Trajner: Antonio Konte