Skandali i dopingut, Gjoza jep dorëheqjen
“Moralisht i detyruar për këtë vendim pas çështjes së Romelës”
Pas skandalit me Romela Begajn, e cila rezultoi pozitive në testin e parë antidoping, presidenti i Federatës Shqiptare të Peshëngritjes, Elez Gjoza, jep dorëheqjen. Ishte ora 15:00 e ditës së djeshme, kur ai ka lajmëruar dorëheqjen nga posti si president i kësaj federate. Ky vendim për dorëheqje të kreut të shtangës shqiptare është marrë pas një mbledhjeje të kryesisë, e cila më pas ia ka deleguar detyrën e presidentit të ri, akademikut dhe pedagogut për 37 vite të matematikës e informatikës, Gudar Beqiraj. Këtë pozicion ai do ta mbajë deri në mbledhjen e Asamblesë së Përgjithshme, organi më i lartë që do të bëjë dhe mandatimin e presidentit të ri. Nisur nga rrethanat në FSHP, presidenti Gjoza u ndie i detyruar që të shkonte në këtë vendimin ekstrem të tij, duke u dorëhequr. Sigurisht skandali më i fundit, ai i dopingut, që përfshiu këtë federatë me shtangisten Romela Begaj, duket se e ka vënë me shpatulla pas murit kreun e peshëngritjes shqiptare. Kjo ndodh në një kohë që po pritej dhe vendimi i ndërkombëtarëve për pozitivitetin e Romela Begajt (rezultati i testit B).
Ja çfarë tha Gjoza lidhur me dorëheqjen para mediave
"Dhashë dorëheqjen, pasi është në moralin tim dhe të federatës që, kur një sportist del pozitiv, presidenti duhet të largohet. Unë jam i shokuar nga
lajmi për Romela Begajn, por për mendimin tim personal, ajo është e pastër si sportiste. Ajo është profesioniste dhe nuk mund të merrte sërish një substancë me të cilën ka dalë pozitive edhe më parë. Ndërkohë që bëhet fjalë për dy pesha të ndryshme ku ajo ka garuar, nga 58 kg në 69 kg. Ndaj ne do të
presim edhe rezultatet e testit B dhe, po të jetë e nevojshme, do ta zgjidhim këtë gjë edhe në gjykatë me ndërkombëtarët. Ne dyshojmë dhe mendojmë se është e pafajshme", u shpreh për mediat, vetëm pak minuta pas dhënies së dorëheqjes, Gjoza. Ndërsa pas dorëheqjes, ai tha se çfarë duhet të ndjekë
pasardhësi i tij: "Federata është e shqiptarëve, federata nuk është e presidentit dhe as e anëtarëve të kryesisë. Ne këtu jemi sërish që kjo federatë, si me të mirat dhe të këqijat e veta, ulje-ngritjet që ka përjetuar, të edukojë brezat e rinj të sportistëve se ajo medalje e marrë pa të drejtë nuk ju takon".