Bajerni nuk fal, Leva dhe Myler magjikë
Do të shkëmbehet kokë më kokë me Mkhitarian, sot pritet të bëhet zyrtare
Ardhja e Aleksis Sançezit në "Old Trafford" provokon xhelozitë e para në dhomën e zhveshjes së Mançester Junajtid. Kur Pol Pogba ka mësuar rrogën që do të përfitojë sulmuesi kilian te "djajtë", nuk është ndierë aspak mirë. 29-vjeçari do të përfitojë mbi 20 milionë në vit, një shifër që në Europë nuk e fiton askush, përveçse kur flitet për emra si Nejmar, Mesi dhe Ronaldo. Dhe "Sunday Mirror" shkruan se pasoja që kjo mund të sjellë për skuadrën e Murinjos është një përçarje në dhomën e zhveshjes dhe në veçanti do e vuajë lojtari më i paguar aktualisht në Angli, Pol Pogba. Tani mesfushori francez kërkon që të fitojë të njëjtën shifër që është në të fakt dyfishi i rrogës së tij aktuale në Mançester. Faktin e përçarjes së dhomës së zhveshjes nga ky transferim e ka konfirmuar edhe ish-asistenti i Fergusonit, Stiv MekLaren.
ORËT E FUNDIT - Dje Sançez fluturoi drejt Mançesterit me një avion privat dhe të dielën kaloi edhe vizitat mjekësore në pritje të zyrtarizimit të marrëveshjes me Arsenalin. Ndërkohë që Mkhitarian udhëtoi që të shtunën në mbrëmje drejt Londrës, i shoqëruar nga menaxheri i tij Mino Raiola. Nga informacionet e mediave britanike, Mançester Junajtid dhe Arsenali nuk do të paguajnë asnjë qindarkë për transferimin e Sançezit dhe Mkhitarianit (ishte përfolur 35 milionë paund), por kiliani dhe mesfushori armen i "djajve" do të shkëmbehen kokë më kokë. Detajet e fundit të marrëveshjeve janë mbyllur, por zyrtarizimi mungoi që të dielën, për shkak se nuk mund të depozitohej asnjë dokument gjatë fundjavës (zyrat janë të mbyllura), kështu që gjithçka u shty për ditën e sotme. Sançez do të bëhet nga kjo kontratë 4.5-vjeçare lojtari më i paguar i Premier Ligës me 450 mijë paund në javë, nga të cilat 350 mijë do të jetë rroga e tij bazë, dhe 100 mijë të tjera e drejta e imazhit. Falë presionit të Raiolës, edhe armeni pritet të pësojë një rritje të konsiderueshme të rrogës prej 140 mijë paundësh që fitonte në "Old Trafford". 28-vjeçari kishte një kontratë deri në vitin 2020 me Junajtid, por menaxheri i tij kërcënoi se nëse Miki nuk do të transferohej tek Arsenali, atëherë Sançez nuk do të shkonte kurrë te Junajtid: "Mançester Junajtid nuk do ta transferojë Sançezin, të paktën nëse Mkhitarian nuk bie dakord me Arsenalin. Operacioni Sançez, është pjesë e bisedimeve për Mkhitarianin dhe jo e kundërta".