Apolonia, dështim në merkato

Dy futbollistë nuk kanë bindur stafin, trajneri Kashami: Nuk gjetëm të duhurit

Apolonia është një ndër skuadrat që i ruajti me fanatizëm lojtarët e saj gjatë merkatos dimërore, edhe pse ka një ekip me kontingjent kryesisht të rinj. Edhe Klajdi Broshka e Taulant Hysenshahaj që kanë pasur oferta nga skuadra të tjera, duket se do të vazhdojnë të jenë pjesë e Apolonisë dhe në vazhdimësi të sezonit. Megjithatë, largimi i Blerim Krasniqit, njeriut-gol, ka krijuar jo pak probleme në vijën e parë. Këtë boshllëk, fierakët synuan ta sistemonin me afrimin e lojtarëve të tjerë. U testua 19vjeçari Kumanaku, por mes palëve nuk u gjet gjuha e përbashkët dhe lojtari tashmë është larguar, ndërsa vazhdon të jetë ende në provë sulmuesi tetovar, Bajrami, i cili pritet të firmosë këtë javë. Gjithashtu, tek Apolonia u provua dhe mesfushori lushnjar, Bledi Fejzaj, i larguar pas miqësores me Dinamon. KASHAMI

Ndërkohë, pasi ka zhvilluar dhe një testim me të rinjtë e akademisë ( fituar 42 nga Apolonia), trajneri Ndriçim Kashami bën dhe një vlerësim të gjendjes së ekipit së tij një javë pas rifillimit të kampionatit. "Mendoj se situata dhe gjendja e ekipit është shumë e mirë. Gjatë kësaj periudhe, skuadra ka arritur të perfeksionojë skemat e lojës, ka ruajtur ritmin dhe ka ardhur duke u përmirësuar në vazhdimësi. Pa dyshim që largimi i Krasniqit na vuri në vështirësi, por mendoj se ka gjetur mënyrën e duhur. Sa u përket blerjeve dhe gjetjes së një lojtari që do të bënte diferencën, tani është e pamundur, ndaj dhe ne do të gjejmë zgjidhje brenda kontingjentit, brenda grupit që kemi. Rikthehemi në kampionat dhe tani na duhet të fokusohemi te përgatitja për ndeshjen kundër Naftëtarit. Jemi optimistë sa u përket objektivave që i kemi besuar vetes në fillim të sezonit", thotë trajneri i Apolonisë, Ndriçim Kashami. MIQËSORET

Katër ndeshje miqësore kanë zhvilluar fierakët gjatë kësaj faze dimërore, me bilancin: 1 fitore, 1 barazim dhe 2 humbje. Apolonia ka fituar 10 me Orikumin, ka barazuar 1-1 me Feronikelin dhe kanë humbur jashtë fushe me Dinamon dhe Egnatian, me të njëjtin rezultat 1- 2. Pavarësisht largimit të Krasniqit, bardhejeshilët vazhdojnë të shënojnë në çdo takim. 4 golat e miqësoreve mbajnë autorësinë e Dimos (2), Dudës dhe Llambit. Fierakët do të kenë të njëjtin grup edhe në pjesën e dytë të sezonit me të vetmin të larguar, Krasniqin.