“Revolucioni” te Besa, Perja: Jemi forcuar!

Mbrojtësi i djathtë është optimist për vazhdimësinë: Skuadra ka ndryshuar ndjeshëm

Besa ka pësuar "revolucion" nga porta e deri në sulm pas afrimeve të janarit. Të vetmit që i kanë rezistuar formacionit nga 2017 janë kapiteni Meglid Mihani dhe mbrojtësi Skerdilajd Perja. Këtij të fundit nuk i kanë munguar ofertat, megjithatë vendosi që t'i qëndrojë besnik fanellës verdhezi. Mbrojtësi i linjës së djathtë, në një bisedë për "Panorama Sport", i bën analizën merkatos dhe flet për objektivat. "Besa ka kryer një merkato për t'u pasur zili, pasi janë afruar plot 13 futbollistë, pra më shumë se një formacion. Janë lojtarë me përvojë, që do t'i japin tjetër frymë grupit. Gjithçka nis me Mirakën, Deliallisin, Pashën dhe Onuh, e për të kaluar te të rinjtë e talentuar si Thaçi, Bushati e të tjerë. Shto këtu futbollistët vendës, kapitenin Mihani dhe Biba, Duka, Brahimaj, Kullolli, Cara apo Hoxha, janë një kolektiv që do ringjallë verdhezinjtë. Miqësoret që kemi zhvilluar, kanë dëshmuar një Besë ndryshe nga ajo e 2017-ës. Unë mendoj se, më shumë se emrat, këtë herë do të flasim në fushë. Në pjesën e parë të sezonit nuk është se na munguan emrat, por në fund rezultatet ishin zhgënjyese. Personalisht besoj se, duke nisur nga sfida e parë në Shijak, do të shihni ndryshimin te Besa. Do të jetë një skuadër krejt ndryshe dhe shpresoj të kënaqim tifozët me lojë", përfundoi lojtari i linjës së djathtë. Meglid Mihani dhe Skerdilajd Perja shihen si dy shtylla në lojën e Besës, me të parin si organizator dhe golashënues dhe të dytin një luftëtar për t'u marrë shembull për pasionin që shfaq në fushë. Verdhezinjtë dolën të mundur në miqësoren e fundit në Patos, por siç mësohet, në një terren tejet të rënduar, lojtarët kavajas që më së shumti përdorin lojën teknike, e patën të pamundur të bënin dy pasime bashkë. Fundja ajo humbje i bën mirë grupit, sepse u kujton të gjithëve atë që Perja thekson me të madhe: "Emrat dhe CV-ja duken në fushën e lojës dhe jo në kontrata". Feriz Ferizaj