Ali Soue alarmon Skënderbeun
Xhejms pritet të bëjë qendërsulmuesin, Daja do të hedhë nga minuta e parë edhe Vilën
Skënderbeu merr një goditje të fortë në prag të ndeshjes kundër Luftëtarit. Sulmuesi kryesor, Ali Soue, ka probleme fizike dhe sipas të gjitha gjasave nuk do të jetë nën urdhrat e Ilir Dajës për këtë takim të parë për këtë vit në kampionat. Edhe pse bëhet fjalë për një ndeshje delikate, bardhekuqtë janë të detyruar të bëjnë pa një prej lojtarëve kyç të repartit të avancuar. Në rast se Soue sakrifikon duke luajtur në Gjirokastër, atëherë rrezikon të përsërisë dëmtimin dhe të mungojë gjatë. Në këto kushte, stafi teknik nuk ka ndërmend të rrezikojë me lojtarin nga Gambia. "Panorama Sport" mëson se situata e sulmuesit është verifikuar dje, teksa sërish ka bërë stërvitje të diferencuar duke ndierë dhimbje në kofshë. Në fakt, që gjatë minifazës përgatitore në Antalia, sulmuesi pati shqetësime muskulore prej ngarkesës që ka marrë, por u mendua se ishte diçka që do të kalonte shpejt. Gjithsesi, nuk ndodhi kështu dhe tani trajneri i Skënderbeut duhet të bëjë llogaritë me tri mungesa të sigurta. Përveç Souesë, korçarët do të jenë pa Suad Sahitin e dëmtuar, si dhe Afrim Takun, i cili ende nuk dihet se kur do të kthehet nga SHBA.
LËVIZJET - Duke parë këtë situatë emergjente, pritet që formacioni i Skënderbeut të ketë mjaft lëvizje në sulm. Me Blerim Krasniqin, që ende nuk është
përshtatur si duhet me pjesën tjetër të ekipit, Daja me shumë mundësi do të gjejë një zgjidhje tjetër për formacionin. Nëse prapavija dhe mesi i fushës nuk do të kenë ndryshime në emra lojtarësh dhe në vendosje, duket se zëvendësuesi i Souesë në majë të sulmit do të jetë nigeriani
Xhejms Adeniji. Ndërsa Gavazaj do të zhvendoset nga e majta, për t'i bërë vend Emiliano Vilës që nga minuta e parë. Paraqitjet e mira që durrsaku i ardhur nga Partizani ka bërë në këtë fazë përgatitore me Skënderbeun, duket se kanë bindur trajnerin Daja që të vendosë
aktivizimin e tij si titullar. Lëvizjet janë të detyrueshme dhe më së shumti vijnë si pasojë e mungesës së Ali Souesë. Për herë të fundit në Gjirokastër, skuadrat kanë luajtur më 30 prill të vitit të kaluar, teksa ka fituar Skënderbeu me një gol të sulmuesit Xhejms.