Lika bën tri lëvizje, Luftëtari ndryshon mbrojtjen dhe sulmin
Liçaj firmos dhe del në stërvitje, ja si pritet të luhet me korçarët
Çdo pozicion i dubluar dhe një rivalitet më i madh se kurrë për një vend titullari. Luftëtari e nis vitin 2018 me një kontingjent për t'u pasur zili, teksa tashmë i duhet trajnerit Hasan Lika për të menaxhuar më së miri një grup ku ka edhe futbollistë, të cilët zor se mund të pranojnë qëndrimin në stol. Dje doli në stërvitje edhe vlonjati Lejdi Liçaj, i cili bëhet lojtari i nëntë që firmos për Luftëtarin në këtë merkato janari. Megjithatë, ndaj Skënderbeut pritet që mesfushori ta nisë nga stoli. Lojtari që më së shumti ka luajtur si mbrojtës i djathtë te gjirokastritët rikthehet për herë të tretë në Gjirokastër pas eksperiencës 6mujore në skuadrën e vendlindjes, Flamurtari. Në stërvitjen e djeshme, trajneri Lika organizoi edhe një ndeshje kontrolli, nga zbuloi në njëfarë mënyre edhe formacionin e mundshëm për përballjen e parë ndaj Skënderbeut, e cila do të luhet të premten, në orën 14: 00, në stadiumin "Gjirokastra". Në ndryshim nga formacioni që mbylli vitin 2017 me një fitore në Kukës, vihen re tri lëvizje, pikërisht dy në repartin mbrojtës dhe një në majën e sulmit. Vendin e të larguarve Vangjel Zguro dhe Valto Zeqja do ta zënë Ivan Jakovljeviç dhe Xhekson Ferreira. Ndërsa kapiteni Orjad Beqiri dhe Oltion Rapa plotësojnë repartin difensiv. Pritet që ky i fundit dhe serbi Jakovljeviç të ndërrojnë shpesh rolet, pasi të dy përshtaten, si në të djathtë, ashtu edhe në qendër të mbrojtjes. Edhe porta tashmë ka konkurrencë, edhe pse Ruçi të rikonfirmohet titullar, ndërsa greku Athanasopulos do ta nisë nga stoli. Mesfusha mbetet e pandryshuar, me dyshen Aleksi-Ramadani, si dhe Rrocën më të spostuar. Ndërsa treshja ofensive do të përbëhet nga Abazaj e Bregu nga krahët, si dhe Vasil Shkurtaj në majë. Ky i fundit debuton me fanellën bluzi të premten. Tomor Shehu