Besa “shfryn” në miqësore, fiton me goleadë para startit
Besa, "shpërthyese" para Erzenit. Kavajasit kanë thyer me goleadë miqtë nga Suhareka të Ballkanit, duke dhënë sinjale tejet pozitive në prag të rifillimit të sezonit. Miqësorja ndaj kosovarëve dëshmon se paraqitja e skuadrës së Bledar Sinellës do të jetë krejt ndryshe në 2018-ën. Duhet thënë që kundërshtari kishte nivel dhe kjo dukej nga organika, ku bënin pjesa emra si Kukaj, Gashi, Elezaj, Hyseni, që më herët kanë luajtur te Kukësi, Vllaznia, Bylisi e Teuta. Në këtë ndeshje ra në sy mungesa e Mahmutajt, për të cilin stafi teknik nuk kishte kurrfarë informacioni NDESHJA - Verdhezinjtë në formën optimale fizike kanë ditur ta shfrytëzojnë më së miri këtë fakt, krahas nivelit të lartë teknik të disa lojtarëve. Ka qenë Pasha që sjell avantazhin, pasi "vjedh" bukur kohën e mbrojtjes mike dhe gjen kuadratin që në të 13-ën minutë. Kavajasit vijojnë të dominojnë lojën falë pasimeve mjaft të sakta të Mihanit e Deliallisit për sulmuesit, Pasha, Thaçi e Onuh. Besa është tepër e zhdërvjellët në aksionet e saj dhe për rrjedhojë nuk vonon për të gjetur golin e dytë në të 30-ën, që këtë herë mbante firmën e mbrojtësi Perja. Vendësit janë të vendosur më së miri në fushë duke komanduar Ballkanin. Këta të fundit mundohen, por mesfusha mbetet "pronë" e Besës dhe sulmuesi me përvojë, Hyseni, mbulohet mjeshtërisht nga Dikson dhe Perja. Disa goditje të miqve janë pa sukses. Në 45 minutat e dyta do të ishte Oshafi protagonist, jo vetëmpasi gjetën rrjetën në të 48-ën dhe 61-ën, por mbi të gjitha për finesën që shfaqi në pasimet e tij të sakta. Ra në sy loja mjaft e mirë edhe e Bushatit, Carës e Bibës. Minutat e fundit sollën zëvendësime masive dhe miqtë arrijnë të korrigjojnë shumë në lojë duke shënuar madje dy herë me anë të Saliajt në të 77-ën dhe Memajt në të 81-ën me 11-metërsh. U mbyll kështu kjo miqësore me Besën që "shfryn" para ndeshjes zyrtare që do të luajnë të dielën përballë Erzenit në transfertë. Verdhezinjtë treguan se nuk kanë vetëm një 11 lojtarë, por edhe stol solid që jep garanci për të ardhmen. Takimi u ndoq edhe nga presidenti Nexhat Bizhdili, që pak ditë më parë është operuar. Feriz Ferizaj