Renditja e kuqezinjve, Gatuzo përgatit kurën
"Klubi më ofroi diçka në merkato, por unë refuzova". Ishte kjo deklaratë e Xhenaro Gatuzos, e cila mbylli përfundimisht dyert e "Milanellos" për çdo emër të përfolur për të zbarkuar te kuqezinjtë. Rino nuk dëshiron të modifikojë asgjë te ky Milan që sapo ka nisur të hedhë hapat e parë në aspektin e vijimësisë. Sfida e dyfishtë me Lacion në kampionat dhe Kupë do të flasë më shumë për gjendjen e ekipit të tij, por ndërkohë trajneri preferon të punojë pa ndryshuar asgjë në organikë. Tetë javë pas emërimit të tij, rezultatet e para po preken me dorë, me "Djallin" që siguron dy fitore radhazi dhe një kualifikim në gjysmëfinalet e Kupës së Italisë. Dora e Gatuzos shihet edhe te rilindjet e Bonuçit dhe Çalhanoglut mbi të gjithë, por edhe te Kaliniç (një penallti e fituar dhe një asist në ndeshjen e fundit) pa harruar Kesin që në nivel kilometrash ka qenë prezent, por tani po ofron edhe golat e parë.
KAPITENI - Ndryshimi i modulit dhe kalimin në 4- 3- 3 duket se ka sjellë disi rendin në fushën e lojës. Ishte kjo lëvizje që simbolizon ndryshimin e parë të bërë nga trajneri aktual pas largimit të Vinçenco Montelës. Megjithëse mbrojtja me tre u stis për të, ishte pikërisht Leonardo Bonuçi që mori frytet e para e skemës së re. Nga derbi i kupës deri më sot, Milani ka pësuar vetëm dy gola në katër gara, teksa vetëm një muaj më parë kuqezinjtë pësonin rregullisht të paktën një rrjetë sa herë zbrisnin në fushë. TRESHJA - Së bashku me kapitenin, efektet e kurës "Gatuzo" nisën t'i merrnin me radhë Çalhanoglu, Bilja dhe Kaliniç. Fantazisti turk ka luajtur gjithmonë duke filluar që nga sfida e fituar ndaj Interit dhjetorin e kaluar. Bilja ndoshta nuk ka pasur shumë vijimësi në prezenca, por sa herë ka luajtur, ka garantuar gjeometri dhe saktësi duke i rrëmbyer vendin Montolivos. Edhe në sulm ka përparime, me Kaliniçin që nga mish i huaj në vijën e parë është shndërruar në një terminal ofensiv. Kroati mbase nuk po shënon sa pritet, por në ndeshjet e fundit ka garantuar substancë, e cila arriti kulmin ndaj Kaljarit, ku fitoi një penallti dhe dhuroi një asist. Për 29-vjeçarin do të jetë prova e "San Siro"-s, ku ende nuk po arrin të tregojë të gjitha vlerat e tij.
PËR T'U PARË - Llogaritë nuk dalin kur hedh sytë nga krahu i majtë i mbrojtjes. Rikardo Rodrigez në kohët e fundit po bën hapa të frikshëm pas, sidomos nëse krahasohet me fillimin e sezonit. Edhe për zviceranin, Gatuzo pritet të sillet si në rastet e mësipërme duke i dhënë besim edhe kur nuk shkëlqen. Disi më e komplikuar duket situata e Andre Silvës, i cili gjithmonë e më shumë po i largohet qendrës së një projekti që e parashikonte protagonist. Rino në rastin e tij fajëson veten, pasi i ka munguar kuraja për ta hedhur më shpesh në fushë, por në një kohë kur rëndësi primare ka rezultati, portugezit i mbetet vetëm që të presë momentin e duhur.