"Ketri" që s'kishte këpucë, ja dhjetë sekretet e Sançezit

1. Aleksiz Sançez ka lindur në Tokopija, në pjesën veriore të Kilit në një qytet me 25.000 banorë. Njerëzit aty merreshin me peshkim, ndërsa në qytetin e tij prodhohej edhe energjia elektrike.

2. Pseudonimi i tij i fëmijërisë ishte "Dija", që ishte shkurtimi spanjisht i "ardija" që do të thotë ketër. Sançez e mori këtë emër për shkak se ngjitej lehtësisht mbi pemë dhe kalonte muret për të kapur topin që shpeshherë përfundonte atje ku nuk duhej.

3. Kiliani kaloi një fëmijëri shumë të vështirë sepse babai i tij u nda nga jeta shumë shpejt, ndërsa e ëma Martina shiste peshk për të siguruar të ardhurat minimale për jetesën. Kur Sançez nisi të luante futboll me Kobreloan në moshën 16-vjeçare, Martina u dënua 1000 dollarë sepse shiste peshk pa licencë.

4. Ai njihet si maratonomak. Kur luante me Udinezen në Itali, ai humbi çelësat e makinës dhe në vend që të përdorte një mjet për t'u rikthyer në shtëpi vendosi që të shkonte duke vrapuar dhe u kthye sërish. Jo më kot e cilësojnë si tmerrin e mbrojtjeve kundërshtare. 5. Pavarësisht se firmosi me Mançester Junajtidin dhe jo për rivalët e tij, Mançester Siti, Sançez e ka vlerësuar gjithmonë Guardiolën. "Ai më bëri të ndihesha si një Ferrari". Edhe Pep e vlerëson shumë sulmuesin kilian: Ai ma ka vjedhur zemrën!

6. Ai nuk kishte këpucë për të luajtur futboll deri në moshën 15-vjeçare. Kur u bë pjesë e Araukos mori një palë të tilla, ndërsa më përpara e ëma e tij i huazonte këpucët që djali të luante. 7. Sançez njihet si një njeri shumë bujar dhe i mirë me banorët e Tokopijës. Në Kili e presin me padurim atë në periudhën e festave sepse u dërgon dhurata fëmijëve, por edhe rroba.

8. Ai është lojtari më i ri i Kilit që ka luajtur me Kombëtaren. Ai ka luajtur kundër Zelandës së Re në vitin 2006. Aktualisht është golashënuesi më i mirë i kësaj kombëtareje me 39 gola.

9. Sulmuesi kilian është i apasionuar pas qenve. Ai ka dy të tillë që i quan Atom dhe Humber. Të dyve u ka hapur një profil në "Instagram". 10. Sançez dëshiron të bëhet aktor kur t'i japë fund karrierës si lojtar. "Do të dija të isha aktor ose të punoja për NASA- n", ka thënë dikur lojtari.