Liga e Kombeve dhe komercializimi deri në qelizë i futbollit

Nuk mjaftojnë të drejtat televizive, zhvillimi i ndeshjeve sipas shijeve dhe interesave të televizioneve dhe bastexhinjve gjigantë, tregtimi e shitja e gjithçkaje që ka të bëjë me futbollin, por u gjetën edhe ndeshjet e ashtuquajtura miqësore, stërvitore që të komercializohen deri në ekstrem. Në vend të ndeshjeve që do t'i shërbenin aktivitetit përkatës në vazhdim europian, miqësoret "gradohen" në ndeshje zyrtare duke u ngjeshur në një të ashtuquajtur Ligë e Kombeve me emër sugjestionues e funksionim të ngatërruar, e duke simuluar kështu marrjen sa më seriozisht të tyre me joshjen e kualifikimit për europian të ndonjë pjesëmarrësi të pafat në kualifikueset zyrtare. Është hapi i radhës i industrisë futbollistike në rrugën e largimit përfundimisht nga vlerat ekzistenciale të futbollit dhe nga një shfaqje sportive, nga një akt miqësie e afrimi e ballafaqimi mes popujve e kulturave të tyre është kthyer në një makineri e komercializuar deri në qelizë, duke i kthyer dhe aktorët në robotë milionerë, të gatshëm e të etur për çdo kontrabandë e manipulim të sipërmarrjes futboll në këmbim të përfitimeve financiare të ligjshme, e më së shumti të paligjshme, ku në ndihmë u vijnë buldozerët e basteve, parajsat fiskale dhe mashtrimi i sistemeve financiare të taksave të vendeve përkatëse ku këta aktorë aktrojnë. Shorti e vuri Shqipërinë në një grup me Skocinë dhe Izraelin e, si shkon puna më tej me kualifikimin e mundshëm, duhet një makinë e vogël llogaritëse që t'u dalësh në krye hesapeve.